Vanglaini - WTA Prague Open entu an awm dawn

KHAWTHLIR

IAS sîksawi

Mizoram sorkarchuan tun hnai khan IAS pathum a sîksawi. Serchhip DC Dr Lalzirmawia Chhangte chu secretary atan ruat a ni a, Printing & Stationery leh Fisheries department a chang ang. Siaha DC Bhupesh Chaudhary chu additional secretary atan ruat niin, Cooperation department a chang ang a, Aizawl additional DC Kumar Abhishek chu Serchhip DC a ni ang.

Mi pali dah lut

Covid-19 vei rinhlelh thilah nimin khan State Referral Hospital-ah mi pali dah luh thar a ni a, an zinga pahnih chu nimin khan swab sample laka endik nghal a ni a, he thu ziah lai hian result a la chhuak lo. Mi dang pahnih chu vawiinah endik an ni ang. SRH-ah hian Covid-19 vei mi 15 enkawl mek a ni a, Makeshift ICU-ah mi pakhat awmin, mi dang 14-te Isolation Ward-ah an awm.

Lungleiah Swab test

June 28, Pathianni khan Lunglei Civil Hospital laboratory-ah Truenat khawl hmangin swab sample 30 endik a ni a, June 27-ah sample 31 endik a ni bawk a; endik zawng zawngte'n Covid-19 an kai lo tih finfiah a nih thu sorkar thuchhuah chuan a tarlang. LCH laboratory-ah hian Pathianni thleng khan sample 299 endik a ni tawh a, sample pahnih chu Covid-19 positive angin a hmu a, ZMC-a endik nawnnaah positive pakhat zawk chu negative a ni tih hmuh a ni thung.

Hnathawh enfiah

Kolasib bialtu MLA K Lalrinliana chuan nimin khan a bial Diakkawn VC area chhunga MLA-LAD Fund, Excluded Area Grant leh Mizoram Finance Commission Grant hmanga hnathawh a hmunah kalin a enfiah a, MLA fund hmanga sak Neuva Section YMA Chawlhbuk chu a chung siam danah duhthu a sam loh thu sawiin, steel structure hmanga nalh zawk leh tha zawka siamtha tur leh estimate pawh siam tha leh turin a ti. K Lalrinliana chuan bial chhung mipuite chu MLA fund an ta a ni tih hria a, fund hmanga hnathawhte ngaihven a, enpui fo turin a chah.

DAWNTISEI

WTA Prague Open entu an awm dawn

Tennis inelna a lo kir leh hnai tawh a, August 10-15 chhunga khelh tur Prague Open-ah chuan match pakhat a hmuna entu mi 2,000 zel an awm thei dawn - tennis fans bakah infiamna ngainatu tan chuan chanchin lawmawm a ni ang.

Prague Open hi hmeichhe player inelna a ni a, clay court tournament a ni. Player langsar Karolina Pliskova leh Petra Kvitova te awmna ram Czech Republic-a inelna neih turah hian player langsar dang pawh an inlan dawn.

Tournament director David Trunda chuan, "Czech player leh mi pawimawh dangte nen pawh kan sawiho tawh a, mipui 2,000 chu a hmunah an kal thei ang," a ti. Inelna hi May thlaa neih tur kha ni mah se Covid-19 vangin a hun an sawn hla a ni.

Tennis inelna hi March thla aṭang khan coronavirus vangin an chawl lailawk a, July thla tawp lamah chuan inelna ṭhenkhat neih theih beisei a ni. US Open leh French Open chu khelh tuma hmalak mek a ni.

Share this Post

Login to comment

No Comments