Vanglaini - Inter, Napoli leh Milan an chak

KHAWTHLIR

IAS sîksawi

Mizoram sorkarchuan tun hnai khan IAS pathum a sîksawi. Serchhip DC Dr Lalzirmawia Chhangte chu secretary atan ruat a ni a, Printing & Stationery leh Fisheries department a chang ang. Siaha DC Bhupesh Chaudhary chu additional secretary atan ruat niin, Cooperation department a chang ang a, Aizawl additional DC Kumar Abhishek chu Serchhip DC a ni ang.

Mi pali dah lut

Covid-19 vei rinhlelh thilah nimin khan State Referral Hospital-ah mi pali dah luh thar a ni a, an zinga pahnih chu nimin khan swab sample laka endik nghal a ni a, he thu ziah lai hian result a la chhuak lo. Mi dang pahnih chu vawiinah endik an ni ang. SRH-ah hian Covid-19 vei mi 15 enkawl mek a ni a, Makeshift ICU-ah mi pakhat awmin, mi dang 14-te Isolation Ward-ah an awm.

Lungleiah Swab test

June 28, Pathianni khan Lunglei Civil Hospital laboratory-ah Truenat khawl hmangin swab sample 30 endik a ni a, June 27-ah sample 31 endik a ni bawk a; endik zawng zawngte'n Covid-19 an kai lo tih finfiah a nih thu sorkar thuchhuah chuan a tarlang. LCH laboratory-ah hian Pathianni thleng khan sample 299 endik a ni tawh a, sample pahnih chu Covid-19 positive angin a hmu a, ZMC-a endik nawnnaah positive pakhat zawk chu negative a ni tih hmuh a ni thung.

Hnathawh enfiah

Kolasib bialtu MLA K Lalrinliana chuan nimin khan a bial Diakkawn VC area chhunga MLA-LAD Fund, Excluded Area Grant leh Mizoram Finance Commission Grant hmanga hnathawh a hmunah kalin a enfiah a, MLA fund hmanga sak Neuva Section YMA Chawlhbuk chu a chung siam danah duhthu a sam loh thu sawiin, steel structure hmanga nalh zawk leh tha zawka siamtha tur leh estimate pawh siam tha leh turin a ti. K Lalrinliana chuan bial chhung mipuite chu MLA fund an ta a ni tih hria a, fund hmanga hnathawhte ngaihven a, enpui fo turin a chah.

DAWNTISEI

Inter, Napoli leh Milan an chak

Pathianni zan Serie A inkhelah champion la beisei Inter Milan an chak a, tun hnaia khel ṭha tluang tak Napoli bakah AC Milan te pawhin an khingpui hnehin point thum an hlawh chhuak ve bawk.

Zanin dar 1:15 hian champion lai leh hmahruaitu ni bawk Juventus chu Genoa mualah an lenglut ve thung dawn a, pahnihna ni lai Lazio pawh Torino hmachhawn turin an zin chhuak bawk ang.

Inter an vannei

Parma mualah Inter Milan an tlawm teuh hle, mualneitu lamin minute 15-naah Gervinho hmangin goal hmahruai an khung. Hun tawp dawnah Inter lamin Stefan de Vrij (84') hmangin an sut hram; Alessandro Bastoni (87') chuan chakna goal a khung leh bawk.

Inter hi an coach Antonio Conte chu hrem a nih avangin khelmualah a naute a ho thei lo a, Marcelo Brozovic, Stefano Sensi leh Matias Vecino te hliam vanga an chawr theih loh bawk avangin nidang an phak lo.

Conte naute hian league match 28 khelh aṭangin point 61 an hlawh chhuak tawh, champion an tumna an la chhawm nung ve zel. An chunga awm Juventus leh Lazio chetsual hun an chang ve reng; Nilaini zanah table mawng lama talbuai mek Brescia an mikhual zui ang.

Match nga chak Napoli

Napoli an che fuh chhunzawm zel, tun hnai Serie A match an khelh hnuhnung pangaah hnehna an chang vek. Tlak hlauhthawnawma ding mek SPAL chu Dries Mertens, Jose Callejon leh Amin Younes te goal khat ṭheuh hmangin 3-1 in an hneh.

Parukna nilai Napoli manager Gennaro Gattuso chuan, "Hetiang baka ṭha chuan a khelh theih loh, ka naute hian tunlai hian football khelh dan tur dik takin an khel a ni. An huaisen a, chak duhin an tuihal reng bawk," tiin a sawi.

Italian manager hian Juventus hnehin Coppa Italia nomawi a chawi tawh a, tunah chuan palina nilai Atalanta umphak an tum thu a sawi mauh mai. Palina Atalanta nen an inthlauhna erawh point 12 a nih avangin a harsa tawh dawn.

Milan pawh

An elpui club lian dangten hnehna an chan laiin AC Milan pawh an awm mai mai bik lo. Ante Rebic leh Hakan Calhanoglu te goal hmangin an chunga awm AS Roma chu 2-0 in an hneh.

Team pahnih hi Champions League khelh beisei lai an ni a, elpui team hneha point thum hmuh theih chu Milan tan a hlu zual bik ang. Stefano Pioli naute hian Nilaini zanah SPAL an hmachhawn zui leh dawn, a zawna point thum hmuh theih an beisei ngam ang.

Kum 54 mi Pioli chuan, "Khua a lum em em a, boruak a hnawng bawk. Khatiang angah kha chuan minute 90 chhung inkhelh kha a harsa hle a, chuti chung chuan ka naute kha tha tho takin an khel thei," a ti. Pathianni zan khan San Siro khaw lum zawng chu 32 degree celsius a ni.

Share this Post

Login to comment

No Comments