Zanin 12:45-ah Brighton Vs Man United

Manchester United chuan zanin dar 12:45 hian Brighton & Hove Albion hmachhawn turin Amex Stadium an tlawh dawn. Ole Gunnar Solskjaer hote hian FA Cup quarterfinal an khelh laiin Wolverhampton Wanderers-in Premier League-ah Aston Villa 1-0 in an hneh a, Wolves hi panganaah inhlangkaiin United erawh paruknaah an awm thung.

Brighton a harsa dawn

Brighton & Hove Albion hi Covid-19 buaina hmain Wolves nen an inhnehtawk a, hrilen hnua inelna ṭan a nih khan Arsenal an hneh bakah Leicester City nen an inhnehtawk. Foxes an hmachhawn ṭum hian Neal Maupay chuan penalty a hlah a, vanduai vang chauhin point thum hmu loah an chhal theih.

Match hnuhnung pathuma Seagulls point hlawhchhuahna hi Champions League khelh beiseina nei vek an ni a, Manchester United an hmachhawn hunah an muala an khelh dawn bawk avangin Solskjaer hote tan chetsual theihna an ni.

United boss Ole Gunnar Solskjaer chuan, "Brighton hian football game ṭha tak an khel ṭhin. Table hnuai lama an awm avangin pressure an nei a, an player-te tawh an khirh sawt ang," tiin an khingpui tur chu tla thei dinhmuna an din avangin khelh a harsat tur thu a sawi.

UCL inchuh boruak

Premier League table thlirin Leicester City, Chelsea leh Wolverhampton Wanderers ten hmunruak pahnih an inchuh tiin a sawi theih a, amaherawhchu Solskjaer-a'n Tottenham, Sheffield United leh Arsenal te an la tel vek thu a sawi.

Palinaa awm mek Chelsea hian match sarih khelh tur an la nei a, Gunners leh Sheffield aiin point 11 leh 10 in an sang. Frank Lampard-a hote an chesual viau a nih ngawt loh chuan Arsenal leh Blades an palina nih phak a harsa tawh ang.

Engtin zel?

Manchester United striker Marcus Rashford-a'n January thla hnuah goal a la khung lo a, English striker hi a dam ṭha tawh mah se goal la a chhawm lo.

Solskjaer chuan, "Marcus hi inhliam vangin hun rei tak a chawl a, chutichung chuan an hriam viauin ka hria. Norwich nen pawh khan goal hmaah a hlauhawm viau a, Sheffield nen vawi hnih khat hlah mah se a ṭhiante goal khung turin a siamsak. Minute tam zawk ka pe dawn a, goal a khung ngei ang," tiin a striker a chhan.

Rashford-a'n goal a khung loh laiin a kawppui Anthony Martial-a'n Sheffield United lakah hattrick a siam thung. United tlarhma chawm tur hian Paul Pogba leh Bruno Fernandes te an awm avangin Solskjaer naute inkhel a hmuhnawm chho a, chutihrualin goal venhim tum Norwich lakah an goal bawh a na tawk lo. 

United midfield laia awm te an chet ṭhat rualin mual sir lam aṭanga na zawka an nawr thei a nih loh chuan Seagulls lakah talbuai thei reng an ni.



Share this Post

Login to comment
No Comments