MNF hi NDA-in hnawk a ti - Zoramthanga

Lok Sabha MP inthlan lo awm tur atana campaign-a feh chhuak MNF president Zoramthanga chuan nimin khan Saitualah thu sawiin, "MNF hi NDA-in hnawk a ti em em," a ti.

MNF President chuan, Mizoram tana hnawk tur an do avangin NDA-in MNF hnawk a tih thu sawiin, "Assam nena kan ramri buaiah Union Home minister Amit Shah-a'n in inhnukdawk tur ani min ti a, 'ka inhnukdawk dawn a nih chuan ka Chief Minister nihna ka inhnuhdawh hmasak a ngai' tiin ka chhang a, a ngawi hlen ta. MNF min thunun lohzia a lang," a ti.

Zoramthanga chuan CAB an dodal tih sawiin, "Mizoram an rawn telh ta lo. UCC a rawn ti leh a, kan duh lo. Mizoram Assembly House-ah kan lo paih thla leh ta tawp mai a nih kha. Kan unau Burma raltlante kan thawnlet dawn loh thu House-ah kan pass. Raltlan ṭanpuina tur kan dil a, cheng vbc. thum bak min pe chhunzawm ta lo," a ti a, free movement regime ṭhiah pawh an do thu a sawi.

Mizoram chief minister Lalduhoma'n NDA-a tel turin MLA inthlan hma khan Assam CM a lo be daih tawh nia sawiin Zoramthanga chuan, "MLA inthlanah pawh sum an rawn ngah tak thut kha. BJP lakah an lo zuk inhralh daih tawh zawk," a ti.

Zoramthanga sawi danin, ZPM hian NDA aṭangin MNF chhuak se, central-a tlaktlum nana NDA zawm an duh. Mah se, MNF angin NDA an do ngam dawn lo tih chu Burma ramri hung chungchangah pawh an zuzi chiang hle. ZPM hian NDA nupui nih an duh laiin an thei lo a, hmei nih an tum hram hram avangin MNF leh BJP an thawk ho tiin min bei thin zawk a ni. MNF chu a chhung aṭanga Mizo hnam tana NDA do nasa ber an ni.

Mizoram aiawh tur atana politics, party, legislator bakah election candidate-ah experienced nei miah lo Delhi-a tirh thlak chu Mizoram tan chuan a thlaphanthlakin mipui tan thlan chi a ni lo tih sawiin Zoramthanga chuan, "MNF MP candidate Pu K Vanlalvena chu fak hranpa ngai loin a ṭhatna kan hmu tawh. Mi huaisen a ni," a ti.

MNF President chuan Zoram mipuite'n an ngaihtuah tur chu tunge Parliament-ah Mizoram humhalh nan huaisen taka au leh experience nei ṭha tih a nih thu sawiin, K Vanlalvena vote vek turin mipuite a sawm.