FA Cup semifinal duhthusam Club pali an la dam

Pathianni zan khan FA Cup fixtures pawh nghal a ni a, club lian pali an dam vek vangin tu pawh inhmachhawn se en a châkawm vek. Champion ngun ber Arsenal leh champion lai Manchester City te pawh fuh an ni a, semifinal pakhat zawkah club legend-in an enkawl Manchester United leh Chelsea te an inhmachhawn dawn.

Semifinal hi July 18 leh 19 hian Wembley Stadium-ah khelh a ni dawn a, final hi August 1-ah khelh tur a ni. Gunners leh City hi Covid-19 hnua Premier League ṭan a nih khan an inhmachhawn nghal a, Pep Guardiola hote 3-0 in an hneh. FA Cup semifinal-ah erawh Mikael Arteta-a'n a naupan lai aṭanga a ngaihsan leh entawn Guardiola hote hneh ngei a tum tawh ang.

Chelsea leh United te hi tun season-ah vawi thum an inhmachhawn tawh a, Ole Gunnar Solskjaer hoten Premier League match hnih bakah League Cup Last 16-ah hnehna an chang vek. Amaherawhchu tun hnaiah Frank Lampard-a hoten nasa takin hma an sawn a, Premier League lamah United chunga an awm bawk avangin dah hniam theih an ni lo.



Share this Post

Login to comment
No Comments