MLA leh CEM ka nih kawp vangin dan ka bawhchhe lo - RM Chakma

Tuichawng bialtu MLA Rasik Mohan Chakma chuan MLA leh Chakma Autonomous District Council (CADC) chief executive member (CEM) a nih kawp chungchangah dan a bawhchhiat loh thu a sawi.

Vanglaini palai zawhna chhangin Rasik Mohan Chakma chuan, dan a bawhchhiat loh thu hi a sawi a, "Dan bawhchhia ila chuan ka bang daih tawh ang. Hetia mualpho taka awm kher hi ka duh bik lo. Mah se, danin min phal sak miau avangin ka bang lo, danin min phalsak na na ban kher ngai ka ti lo," a ti.

Rasik Mohan Chakma chuan insawifiah tura tih nimah se, a la insawifiah loh thu sawiin, "Hun a la tam thoa, ka la insawifiah lo," a ti a, Assembly Speaker hnenah dan a bawhchhiat loh thu a thlen dawn thu a sawi.

Tarlan tawh angin Assembly speaker Lalbiakzama chuan Tuichawng bialtu MLA Rasik Mohan Chakma chu MLA aṭanga bàn a nih loh chhan tur sawifiah turin March 23, 2024 khan a hriattir.

Assembly Speaker hian Chakma Autonomous District Council (CADC) MDC Doymoy Daveng Chakma hnen aṭangin complaint a dawn thu Rasik Mohan Chakma a hriattir a, "CADC Chief Executive Member ni chunga MLA i ni reng hi dan bawhchhiatna a nih thu a rawn thlen a, dan angin MLA aṭanga bàntir theih i ni," a ti.

Rasik Mohan Chakma hi The Mizoram State Legislature Members (Removal of Disqualification) (Amendment) Act, 2006 hmanga MLA aṭanga bàn a nih loh chhan tur April 15, 2024 hmaa sawifiah tura tih a ni.

Kum 2023 MLA inthlan khan Rasik Mohan Chakma hi CADC CEM a nih laiin MNF ticket-in Tuichawng bialah MLA atan thlan tlin a ni a, tunah hian CADC CEM leh MLA a ni kawp mek a ni.