MJA-in inkhawmpui an hmang; President-ah C Lalrambuatsaiha thlan a ni

Mizoram Journalist Association (MJA) chuan nimin khan Lianchhiari Run, DIPR-ah inkhawmpui an hmang a, IPR addl. secretary Betsy Zothanpari Sailo-in a hmanpui. MJA inkhawmpuiah hian kum 2024-2026 chhunga MJA hruaitu tur thlan nghal niin, president atan president ni lai C Lalrambuatsaiha thlan nawn a ni.

Betsy Zothanpari chuan social media, electronic media leh print media avangin khawvel thil thleng hriat zung zung theih a nih thu a sawi a, "Journalist-te hi mipuite thil hrilh hretu in ni a, dinhmun pawimawh takah in ding. Hnam dang media-te elpha turin ṭan in lak thar zel a pawimawh," a ti.

IPR Addl. Secretary chuan politics-ah ṭan lam nei loa neutrality vawnghim turin MJA member-te a chah a, "Thudik tâwk lo vangin mi rilru tihnat theih a ni a, fimkhur a pawimawh," a ti a, sorkar laka mahni hamṭhatna ûm lutuk awm palh thei a nih avangin fimkhur a ṭhat thu a sawi.

MJA president C Lalrambuatsaiha pawhin thu sawiin, "MJA hi tlawmngai pawl a ni lo, pressure group pawh a ni hek lo. Eizawnna avanga intelkhawm kan ni. Sorkara pressure pek vak hi pawl dang angin kan tih tur a ni chiah lo," a ti.

'Mite'n tunge a nih min tih' tihah in enfiah fo a ngaih thu sawiin MJA President chuan, "Mi min hmuh dan hi kan inhmuh dan aiin a dik zawk fo ṭhin," a ti a, miin engtin nge an hmuh tih in enfiah fo a, insiamṭhat a ṭulnaah insiamṭha turin MJA member-te a chah.

C Lalrambuatsaiha chuan social media-in mi a run mek tih sawiin, "Print media a tlahniam a, mahse a ral dawn lo. Taima zawk leh rim zawka thawkte chu an ding chhuak zel ang," a ti.

MJA khawmpui hi MJA vice president Lalremsiama'n kaihruaiin, general secretary Lalrinmawia Sailo-in report a pek bakah, an member thite sunna hun an hmang.

Chawhnu lamah ro an rel bakah, Mizoram Information Service Association (MISA) kaihhruaiin kum 2024-2026 chhunga MJA hruaitu turte thlan a ni a; president-ah C Lalrambuatsaiha, The Aizawl Post; vice president-ah C Lalhmachhuana, Youth Herald leh treasurer-ah Lalrinmawia Sailo, Thlirtu te an thlang. Anni bakah hian executive member (EM) tur mi 11 an thlang bawk.

MJA hian resolution pahnih - 'Mizoram sorkarin Mizoram Journalists' Pension Scheme min siamsak hi a lawmawm kan ti a, a taka hman theih a nih tâk avangin Mizoram sorkar chungah thinlung takin lawmthu kan sawi a ni. Chutih rualin, pension scheme hi a famkim tâwk lo a, siamṭhat ngai laite Mizoram sorkar hian min siamṭhat sak rawh se' tih leh, 'Hun rei tak kan lo buaipui tawh press enclave chu Aizawlah din a nih theih nan chak taka hma lak ni rawh se,' tih an pawm.