Blues tan Premier League a la pawimawh avangin FA Cup-ah team ṭha ber dahluh a la rem lo a, Frank Lampard-a'n Manchester City hnehtu aṭangin player paruk ngawt a thlak. Player panga Antonio Rudiger, N'Golo Kante, Mason Mount, Christian Pulisic leh Willian te chiah an inlan nawn a, Blues ṭha ber an ni lo.
Leicester City erawhin inhliam vangin James Maddison an chhawr thei lo a, inkhel bul ṭantu dang erawh ṭum dang bul ṭan ṭhin te tho an nih avangin semifinal luh an tum hle tih a hriat theih.
Foxes an chungnung
Foxes-in inkhel bul pawh an ṭan ṭha a, Wilfred Ndidi ball tauh leh Youri Tielemans ball pet te chu Willy Caballero-a'n a dansak a. Ben Chillwell-a freeekick ṭha zet chu Jonny Evans-a'n goal ban pawnah chiah a tauh bawk.
Chelsea-in chance nei meuh lo mah se Man City laka che ṭha Pulisic-a'n goal-ah kawh zetin a pet a, Kasper Schmeichel-a'n a dang ṭha takzet. First half-ah goal a lut lo a, Blues-in insiamṭhat an mamawh takzet.
Substitution awmze nei
Frank Lampard-a'n second half ṭantirhah substitution pathum ngawt a thlak. Mount, Billy Gilmour leh Reece James aiah Barkley, Mateo Kovacic leh Cesar Azpilicueta te an lut a, London club inkhel a nung sawt.
Minute 63-naah dinglam aṭanga Willian-a cross chu susbstitute Barkley-a'n ṭha zetin a tlawh lut. Lampard-a'n player thlak kualin awmzia a nei a, first half-a khel chhe zawkin goal an khung.
Hun tawp lamah Leicester-in an nawr chiam a, Chelsea tlarhnung a phui tlat avangin Foxes-in tih ngaihna tak an hre lo. Blues zawkin counter attack hmangin goal khung theihna hun ṭha an nei a, Barkley ball pet kawh zet chu Schmeichel-a'n ṭha takin a dang.
Engtin zel?
Leicester City-in Covid-19 vanga buai hnuah chak an la nei lo a, Premier League-ah vawi hnih an khingpui an hnehtawk pui hnuah FA Cup-ah Chelsea an hneh lo. Foxes hi league-ah pathumnaah awm mah se an hnuaia awm ten a hlat tawh lo a, Brendan Rodgers-a hote hi FA Cup aṭanga an tlak bakah Champions League khel pha lo thei dinhmunah an ding.
Chelsea erawhin Aston Villa leh Man City an hneh hnuah FA Cup semifinal an lut a, Frank Lampard-a hote ten result ṭha an nei. Chutihrualin Foxes laka an khelh danah erawh Lampard a lawm lo.
Blues boss chuan, "First half-a kan khelh dan khan ṭum danga kan khelh dan a pha lo a, second half-ah erawh kan insiamṭha hret. Hetianga kan khel nawn a nih chuan kan chak nawn tawh lo ang. Kan vannei a ni," tiin a sawi.
Second half-ah Christian Pulisic leh Andreas Christensen te hliam vangin lakchhuah an ni a, Blues ṭantuten an inhliam nat loh an beisei ang.
Login to comment
No Comments