NorthEast volleyball thiam ber Mizoram : Mizoramin Manipur an sawp

Mizoram mipa volleyball team chuan nimin tlai khan Manipur 3-0 (25-16, 25-20, 25-21) a sawpin North East Olympic Games champion an ni.

Nagaland-a inelna neihah Mizoram team hi an che ṭha takzet a, match vawi nga an khelhah set hloh miah loin an chak vek. Final-a an hneh tak Manipur phei chu pool match lamah set hloh lo bawk hian an lo sawp tawh bawk.

Mizoramin league round lama an sawp tawh Manipur an hlau lo, point hmasa ber hmu turin Manipur lam vuak an lo dan (block) sak a, set khatna point hnuhnung ber hmu tur pawhin ching zetin an hlap an lo dansak leh bawk.

Set hnihnaah Mizoram lam tihsual vangin Manipur lamin point hnih an hmu hmasa. Mizoram lamin kal fal an harsat hret a, point an inhmuhchhawk zak zak; 13-13 a nih laiin coach Lalhmangaiha'n time out a ko.

Time out hnuah Mizoram lamin point hnih an hmu zawn nghal, hun pawimawhah Valbuanga'n a zawna point thum rawn hlap chhuakin set tawp thlengin hnung lam an hawi tawh lo, point riata sang zawk chungin set hnihna an la.

Set hnuhnung berah pawh thawnthu a danglam tam lo. Manipur lamin thapui thawhin point hnuha san zawk zuai lai pawh an nei. Mahse, set hmasa pahnih ang bawkin hun pawimawh laiin Mizoram bawk an che fuh a, an chak tlang.

Mizoram Volleyball Associaton-in tualchhung volleyball inelna lian - Pro Volleyball League (PVL) a buatsaih ṭhin chu a rah chhuah kan hmu. Mizo player an hmuhnawm a, state dang player ten an chung en tih a hriat, kawng tinrengah an chungnung hle.

MVA secretary C. Lalrokhuma chuan, "North East Olympic Games-ah hian volleyball hi a vawi khat awmna a ni a, chumi a kan champion thei hi a lawmawm takzet. Tun hmain state dangte nen pawh inelna dangah kan lo inkhel tawh ṭhin, kan hneh hleithei ngai lo.

"Tunah erawh thil a danglam ta, kan hneh a ni mai loa chiang taka kan chak thei hi a lawmawm. Inbuatsaihna hi kan theihtawpa ṭhain kan nei a, hmunhma phal taka min hman tirtu TNT chungah pawh kan lawm," tiin Vanglaini a hrilh.