NE Olympic Games - Badminton : C. Lalramsanga leh Lalrempuii ten gold an la

3rd NorthEast Olympic Games-ah Mizoram badminton team an che ṭha a, medal paruk an hlawh chhuak. Men's team-in gold medal an lak hnuin mixed doubles-ah C. Lalramsanga leh Lalrempuii ten nimin khan gold medal an la. Men's singles final-ah Saitluangpuia Sailo a vanduai a, women's doubles-ah Saron Veng nula pahnih Lalrinhlui leh Zothansangi te an chak zo lo - silver medal-ah an lungawi a ṭul.

Women's singles-ah Mission Veng nula Laldingpuii'n bronze medal a hlawk chhuak a, men's doubles-ah Bungkawn tlangval Lalrinawma leh Republic Vengthlang tlangval Laldintluanga Tlau te inkawpin bronze medal an la bawk.

A hmasa berah Gold

Mizoramin category pathumah final an lut a, gold medal pathum dang an beisei. Match hmasa berah mixed doubles khelh a ni a, Durtlang rawlthar C. Lalramsanga leh Serchhip tleirawl Lalrempuii te an che ṭha hle.

Harsatna nei loin Mizoram aiawhte hian an khingpui Nagaland aiawh Vikhietuo Kense & Shekhotolu Puro te chu 21-17, 21-13 in an hneh. NE Olympic Games-a gold lak hi a awlsam lo a, Ramsanga leh Rempuii te kum 16 ve ve ni mah se MBA leh an nu leh pate inpekna zarah zirtirna an dawng ṭha hle.

An pahnih hian BAI National Centre of Excellence, Guwahati-ah an awm dun mek. Ramsanga hian talent a nei ṭha a, Gopichand Academy-ah pawh a awm tawh. Rempuii hi Serchhip RDC aṭangin a inzir ṭan a, Raipur-a ITM Academy-ah awm lehin All India-a a ranking ṭhat vangin NCE, Guwahati-ah hian an la.

Gold an hlawhchhuah theih nan MBA leh Tata Trusts thawhhona ṭha pawimawhna a lang a, kum 16 mi lek pahnih NE Olympic-a gold medal an vaw chhuak hi a ropui hle.

Silver pahnih

Men's singles-ah Ramhlun Venglai tlangval Saitluangpuia Sailo leh Arunachal aiawh Arun Chetry te an inkhel a, an intluktawk takzet. Tluangpuia hi Mizo zinga Gopichand Academy-a awm hmasa a ni a, final-ah hian 18-21, 22-24 in an vanduai.

Set hnihnaah Tluanguia hian ṭum thum ngawt set lak theihna hun ṭha a nei a, a bawhpelh vek. Training ṭha dawng ve tho, Arun Chetry-a'n a hun ṭha a bawhpelh si loh avangin Mizo tlangval a vanduai zawkah a ṭang.

Saron Veng nula pahnih Lalrinhlui leh Zothansangi ten women's doubles final-ah Arunachal aiawh Pinky Karki leh Taring Yania te inkawp an hmachhawn a, an inkhel tawk hle. Hlutei leh Sangsangi te hi tualchhunga chher hriam an ni a, Mizoram women's doubles number 1 ni lai an ni.

Set hmasa berah Arunachal lamin 21-12 in an la nghal a, Saron Veng nula pahnih hi rawn tho chhuakin 21-15 in an la let. Pinky leh Taring te an ding chang ta zawk a, 21-11 in set tawp ber an la.

Medal paruk

Mizoram coach Roger Lalthlamuana chuan, "Duhthusam result hlawh chhuak lo mah ila, kan thlen chinah kan lawm. Tun dinhmun kan thlen theihna chhan hi Pahtian vang liau liau a ni. MBA aṭangin thlawpna kan dawng ṭha a, kan player-ten Mizoram tan an theihna zawng zawng an hlan a, an chungah kan lawm takzet," tiin Vanglaini a hrilh.

MBA secretary Lalrinzuala chuan, "Kum danga kan hneh ngai loh state-te kan han hneh ta a, kan naute khelh danah kan lawm hle. Badminton-in hma kan sawn theihna tura kan thawhpui Tata Trusts chungah kan la a, Mizoram sorkar nen thawhhona ṭha kan nei ang a, tun aiin hma kan la sawn thei ang. MBA hian kum dik takin inelna kan kalpui a, a rah chhuah kan hmu hi kan lawmna belhchhatu a ni," tiin Vanglaini a hrilh.