Referee chungah Real Madrid an lawm lo

La Liga hmahruaitu Real Madrid chuan Osasuna nen an inkhelh ṭuma vun rawng vanga hmuhsit tawk, an forward Vinicius Jr chunga thil thleng chu referee Juan Martinez Munuera chuan a report-ah a tarlang lo niin an sawi a, an lungawi loh vangin referee chungah lungawi lohna an thehlut.

Tun hnai kum thum chhunga vun rawng vanga deuna tawk ngun tak Vinicius hian, 4-2 a Osasuna an hneh ṭumin goal hnih a khung a, he inkhelah hian Osasuna fan-te hian chi inthliarna lam hawiin an au khum niin Real chuan an sawi - Osasuna erawh chuan an pha thung.

Real chuan, "Referee hian Vinicius an auh nawmnahna leh tihelnate chu hai derin, a report-ah hian hre reng chungin a tarlang tel lo a ni," an ti a, Vinicius an auh nawmnah lai hian an player-te ngei pawhin referee hi an hriattir thu an sawi bawk.

Madrid khaw club chuan sawi chhunzawmin, "Real Madrid chuan chi inthliarna, hmuhsitna leh inhuatna thleng ṭhinte hi a dem takzet a, kan player Vinicius Junior-a'n a tawh fo he thil ṭha lo tak hi nuai bo a nih ngei theih nan a ṭul anga hmalak kan phut tlat a ni," an ti.

Hetihlai hian Osasuna chuan an fans zingah chi inthliarna lam hawia che an awm loh thu sawiin, thuchhuah an siam ve nghal a, Osasuna chuan, "Real Madrid thuchhuah avanga media lama kan thil lo hmuhte thlirin, El Sadar (an stadium) chu chi inthliarna hmun ang hialin a lang thei a, mahse, Osasuna chuan Real nen kan inkhelah khan chi inthliarna lam hawi ṭawngkam engmah hman a ni lo, tih kan sawi duh a ni," an ti thung.

Osasuna chuan an club fan-te lamah an ṭan tlat thu sawi zuiin, "Osasuna ṭantu te, engtik lai maha chi inthliarna lam tilang ngai lotute tihmualpho tumna hi kan dem takzet a ni," an ti.

Real hian kar hmasa Zirtawpni khan Vinicius chunga thil thleng chungchangah tho thuneitute hnenah thubuai an lo theh lut tawh a, Atletico Madrid leh Barcelona fan-te chuan Champions League match-a Inter Milan leh Napoli an hmachhawn ṭumin, Vinicius deusawhna an chhak chhuak a ni.

Kum 23 mi Vinicius hian tun hnaiah chi inthliarna lam hawia beih a tawk nasa malh malh hle. September 2022 khan Madrid derby-ah Atletico fan-ten lo au nawmnah tawhin, Atletico pawhin an fans ṭhenkhat chet dan an dem thu an lo sawi tawh a, he thubuai hi ngaihtuah mek a ni.

January 2023 khan Real training ground hnaiah Vinicius-a lem chu mi paliin an khai kang a, an pali hian kum hnih chhung stadium lut thei lo tura hrem an ni a, €60,001 (Rs. 54,12,667) chawitir an ni bawk.

Nikum May thlaa Real leh Valencia inkhelh ṭumin fans ṭhenkhat chuan Vinicius hi au nawmnahin, fans pathum chu kum khat chhung inkhel en thei lo tur leh €5,000 (Rs. 4,51,034)chawi tura hrem an ni.

Kuminah pawh Vinicius deuna hi a la tawp lo. October thlaa Sevilla leh Barcelona nena an inkhelh ṭum te, tun thlatira Valencia nen an inkhelh ṭumtein Vinicius hi a vun rawng vanga auh nawmnah a lo ni tawh.