Vawiin aṭangin 3rd NorthEast Olympic Games 2024 ṭan dawn

19th March, 2024

3rd NorthEast Olympic Games 2024 opening ceremony chu nizan khan Regional Centre for Sporting Excellence, Sovima, Chumoukedima-ah neih a ni a, vawiin aṭangin inelna ṭan a ni ang. Opening ceremony-ah hian Nagaland chief minister Neiphiu Rio chu khualzahawm a ni a, ani hi Nagaland Olympic Association-ah President a ni.

NE Olympic Games-ah hian infiamna chi 15 hmanga inel tur a ni a, a thlengtu Nagaland an nih avanga an telh Pencak Silat leh Belt Wrestling-ah te Mizoram hi an tel lo. A bak inelna 13 - Archery (6), Athletics (11), Boxing (21), Taekwondo (16), Wrestling (21), Wushu (6), Badminton (14), Basketball (28), Football (20), Sepaktakraw (11), Taekwondo (2), Volleyball (14), Tennis (4) leh Table Tennis (7) ah Mizoram hi an tel ang.

Olympic vawi 1-na

NE Olympic Games hmasa ber chu kum 2018 khan Manipur-ah neih a ni a, gold 79 zet latu Manipur chu chiang takin pakhatna an ni. Manipur hian medal 159 zet an la a; an medal lak zat hi an hnuaia lama awm state pali Nagaland (41), Meghalaya (40), Sikkim (25) leh Tripura (20) te medal lak belhkhawm aiin a tam zawk.

Mizoramin gold pariat bakah silver 15 leh bronze 29 lain, an medal lak belhkhawm chu 52 a ni a; palinaah an awm. Gold lak tam kawngah Mizoram hian an chung chiaha awm Arunachal Pradesh (18) chiang takin an pha lo a; Assam (45) leh Manipur (79) te chu an el pha lo hrim hrim.

Olympic vawi 2-na

NE Olympic vawi hnihna chu Meghalaya-ah khelh a ni a; inelna neih hmasak ber ṭuma che ṭha Manipur (G-78), Assam (G-75), Arunachal Pradesh (G-38) te chu an indawt leh ṭhap. Inelna thlengtu Meghalaya-in nasa takin hma an sawn a, gold 34 an la. Mizoram erawhin gold 15 la mah se gold 16 latu Nagaland an tluk phak loh avangin paruknaah an awm.

NE Olympic vawi thumnaah Manipur leh Assam te hi chu che ṭha leh tura ngaih an ni a, Arunachal Pradesh leh Meghalaya pawh tluk phak harsa tur an ni. Nagaland hi inelna thlengtu an nih avangin ṭum dang aiin medal lak tamna chance a sang a, Mizoram tan parukna chung lama awm hi a harsat a rinawm.