Premier League khelh tum Ipswich

Kum 2000 chho vela Ipswich Town kha in la hria em aw? Season tharah Premier League an lo kir mai thei - Inrinni zan khan Sheffield Wednesday chu 6-0 ngawtin an sawp a, Championship table-ah pahnihnaah an chho.

Ipswich Town tan hian Omari Hutchinson leh Ali Al-Hamadi te chuan goal hnih ve ve an khung a, Cameron Burgess leh Nathan Broadhead ten goal khat ve ve an khung bawk - Sheffield Wednesday lamin a chhanletna tur an nei lo.

Manchester United assistant coach hlui Kieran McKenna chuan Ipswich Town hi a enkawl mek a, season hmasa khan League One aṭangin Championship hi a hruai thleng. Season thara Premier League khel thei dinhmunah a siam leh ta a, kum 37 mi manager hnathawh hi a ropui hle.

Hetihrual hian Ipswich hi he thuziak i chhiar meuh chuan pathumnaah an tla leh tawh mai thei. Nizan khan Leeds United leh Millwall inkhelin, an result kan hre hman lo a, Leeds hi an chak chuan table-ah pahnihna an ni ang.

Championship-ah hian table-a pahnihna chin chu Premier League khel turin an tling chiang ṭhin a, pathumna aṭanga paruknaten playoff khelin, hmun ruak pakhat an inchuh leh ṭhin.