Santosh Trophy-ah Mizoram team tan Mizo

Mizoram team-in February 19, Thawhṭanni zingah Itanagar an thleng a, a hmuak tura Arunachal Pradesh FA-in a tirh chauh ni loin Itanagar Mizo Welfare Association (IMWA) hruaitute an tel nghal. IMWA hruaitute hian Santosh Trophy final round khel tura Mizoram an inpettling khan, final round khelh hun hi an nghahhlelh nghal thu an sawi.

Mizoram manager K. Lalenghluna (Maenga) chuan, "February 19, 2024, varṭianah Itanagar kan lut a. Kan beisei hauh loin Itanagar Mizo Welfare Association hruaituten ṭawngṭaina nen min lo hmuak a, kan lawmin kan thla a muang siai siai hle," tiin Mizoten an thla an tihmuan thu a sawi.

Chak lote hnemtu

IMWA president Lalrinfela hoin Mizoram team hi an thlenna Hotel Tsangpo-ah an lo nghak bawk a, inelna ṭan hma hauhin Mizoram team-in Mizote aṭangin ṭawiawmna ṭha an dawng. Mizoram hian match hmasa berah Maharashtra chu February 22, Ningani zanah an hmachhawn a, hemi hma zan hian Arunachal & Mission Field West field secretary Rev. Malsawmtuanga chuan Mizoram team thlenna hotel-ah hunserh hmangin fuihna thuchah a sawi nghal bawk.

Maharashtra hmachhawn ṭumin Mizoramin ṭawiawmtu a nei ṭha nghal a, Lalsangzuala Hmar kaihhruai team hi 3-1 in tlawm mah se Mizote hian Mizoram team hi an au el lo a; inkhelh tawp thleng an au phur zawk. Match hnihnaah Mizoramin Karnataka an hmachhawn a, 2-0 a hma an hruai hnuah 2-2 in inkhel a tawp. Hemi ṭum pawh hian Mizoram team hnual zet chu IMWA hian an la au phur ṭha hle.

A nuam leh hrehawmah

Mizoramin match thumnaah harhtharna an chang a; inkhelh hmaa table hmahruaitu Delhi chu Mizoramin 5-1 zetin an sawp. Mizoram team ṭan tura kal khawm Mizoten hlim taka auna tur hun an nei ve ta a, beiseina thar a rawn piang bawk.

Mahse, Mizoram hi group stage-a ṭantu an neih ṭhat ber ṭumin Manipur lakah an mualpho a, 4-1 in an tlawm. Hemi ṭum hi Mizoram team-in hrehawm an tih ber leh ṭawiawmna an dawn ṭhat ber a ni hial ang.

Manipur hian goal li an khung a, Mizoramin beisei tur an neih loh hnuah pawh Manipur ṭantu ṭhahnem tak aiin Mizoram ṭantute thawm a ring zawk. Premier League match ṭhahnem takah an club ṭanten goal an chhuah hnemin supporter ṭhahnem takin inkhelh ṭantirh lamah te pawh stadium chhuahsan ṭum an nei a, mahse Mizoram ṭantu Itanagar Mizo Welfare Association-te chu an ni ve lo. A tawp thlengin Mizoram team an au phur.

Khelmual pawn leh chhung

Santosh Trophy final round-ah match khelh tur a tlem a, hahdam hun a awm meuh loh avangin player-ten ngai an awh hman lo. IMWA member aṭangin 'massage' thiam an awm lehzel a, a thlawn vekin player-te an rawn massage. Mizoram team tan a hlu takzet.

Inkhel en man hi Rs. 100 a ni a, Arunachal Pradesh-ah public transport a chhiat avangin en man aiin stadium thlenna man hi a la to zawk. Heti chung hian chawhma dar 10:00-a Mizoramin Railways an hmachhawn ṭum pawhin entu ṭhahnem tak an awm a, 4-0 a hnehna an channa kawngah an pawimawh hle.

Railways an hmachhawn hma hian India aiawha rugby team-a tel tawh Jeremy Remlamfaka chuan fuihna thu a sawi a, Manipur hneh lo hlim Mizoram team tan chaw ṭha a ni. Quarterfinal-ah Mizoramin Kerala an hmachhawn a, goal awm lo mah se inkhel hmuhnawm bikah penalty shootout hmangin Mizoram an vannei.

Hemi ṭum hian Kerala pawhin ṭantu ṭhahnem tak neiin khuang nen rawn thawk chhuak mah se Mizoram ṭantu Mizote bawk an au ring zawk. Penalty pet dawn meuh chuan Kerala ṭantute thawm a rin ṭhat tawk loh laiin Mizoram ṭantute thawm erawh a ring hle.

Semifinal-a Mizoram leh Services inkhel kha Mizoram team-in ṭawiawmtu a neih ṭhat ber a ni hial ang. Mizoram ṭan tura rawn pen chhuakte hi Itanagar bakah a chhehvel khua Thrizino, Maduripathar, Semen Chapori, Ziro leh Laimekuri bakah Assam khawpui Guwahati aṭangin an kal khawm. Ṭhenkhat phei chu inkhel en tur hian zan aṭangin an chhuak hial a, ṭum khat chauh a ni lo - group stage aṭangin hmun hla tak aṭanga Mizoram ṭawiawmtu an awm. Mizoram team tana an inpekna hi a thuk takzet.

Mizoram 2-1 in chak zo lo mah se hun tawp lamah na takin an nawr let a, Mizo mipuite hian Mizoram team tan phurna nasa tak an rawn siam. Mizoram manager Maenga chuan, "Mahni insengsoin kan inkhelhna hmun, khawpui aṭanga hla tham takah member ṭhahnem takin min ṭawiawmin min au phur ṭhin a. Kan khelh chhiat ber lai pawhin min tlanchhiatsan lo. Mihringte chuan min ngainatute leh min duhsaktute bula khawsak hi nuam kan ti ṭhin. Itanagar leh a chhehvela Mizote hian min ngainain min thlahlel thiam em em a, chuvangin Mizoram Santosh Team te chuan an bula khawsak nuam kan ti tak zet a, an chungah hian kan lawm hle a ni," tiin Vanglaini a hrilh.

Naharlagun-ah Chapchar Kut

Mizoramin beisei tur an neih loh hnuin ticket an nei mai lo a, March 10, Inrinni zanah an haw thei chauh. Itanagar Mizo Welfare Association-in a sawm angin Mizoram team hi IMWA Chapchar Kut lawmna Naharlagun-a neihah an tel.

IMWA-in an duat thiam bawk a, Mizoram team pawhin nuam an ti hle. Santosh Trophy laia hming langsar ber jersey no. 77 hatu Malsawmfela chu Mister Chapchar Kutah an thlang a, IMWA zarah Sawmfela hian a pianchampha phak a lawm ropui hle. IMWA leh Mizoram team hian chaw hlui tui tak an kil ho a ni.

IMWA president Lalrinfela chuan, "Chapchar Kut hlimawm tak kan hmang a; NERIST lama kan zirlaite leh Itanagar-a kan unau Kuki awm hote pawhin item ropui tak tak rawn neiin kan hlim hle. Kan beisei miah loin Santosh Trophy Mizoram Team-ten an hun chep tak karah hun min rawn hman pui a, kut thawhlawm atan Rs 5,000 lai min rawn pe bawk nen kan va lawm em. Mizoram team manager, coaching staff leh players zawng zawngte chungah thinlung takin Itanagar Mizo Welfare Association chuan lawmthu kan sawi tak meuh meuh a ni," tiin Vanglaini a hrilh.