Chawlh zai rel lo Arsenal

Kai Havertz chuan Aaron Ramsdale an demna tur a hliah khuh a, hun pawimawh laiah tak goal a khung avangin Arsenal chu an mikhual Brentford lakah 2-1 in hnehna a chanpui.

Mikel Arteta naute hian Premier League match 28 aṭanga point 64 hmuin hma an hruai lailawk, nizan khan Liverpool leh Manchester City an inkhel a, eng result pawh thleng se pahnihna chin chu an ni dawn.

Inrinni zan Emirates Stadium-a inkhelah Declan Rice-a tauh luh chu mikhual lamin Yoane Wissa hmangin an sut a, hun tawp dawnah Chelsea aṭanga an lakluh Havertz chuan point thum hmuhna goal a tauh lut.

North London club hian Champions League-ah Porto an mikhual zui dawn a, chumi hnuah Man City khel turin Etihad Stadium an pan ang, champion turin an ṭha tawk em, tih chu a takin kan hmu dawn.

Laipui a puak

Tun hnaiah Arsenal an khel ṭha ṭhin a, goal pawh an khung hnem. Gabriel Martinelli a inkhelh theih loh avangin Leandro Trossard-a'n bul a ṭan a, goalkeeper David Raya pawh a club nghet Brentford a hmachhawn thei lo - Ramsdale a lut thung.

Rin lawk ang ngeiin Gunners lamin inkhel an thunun, goal erawh ni dang angin an khung pawp pawp lem lo. Minute 19-naah Ben White-a cross chu midfielder Rice chuan a lo tauh lut, goal dang a luh chhunzawm leh nual rinna a lian.

Mahse, chawlhlawk hma deuhin Ramsdale a chesual. Ball a pet chhuah har avangin Wissa-a'n a va nangching a, pet perin goal lamah a lut - second half lamah thil a harsat phah chhunzawm viau.

Ivan Toney-a'n hla tak aṭangin Ramsdale lo pen chhuak a hmu a, laklawh nei miah loin goal lamah a pet thut. English keeper hian rang taka tawlh hnungin a nam chhuak hram a, a hnu lamah an goal lama lut tur ṭha taka dan vawi hnih a nei bawk.

Arteta-a'n chak zo lo thei an ni tih a hmu fiah, striker Gabril Jesus dah lut mah se kawngro a su thei lo. A tawpah erawh box chhunga hnawksak thei tak Havertz bawkin White-a siamsak bawk tauh lutin an chak.

Ramsdale a chhan

Inkhelh banah English chanchinbu mite chuan Aaron Ramsdale chanchin chu nasa takin an sawi zui a, hmun nghet chang lo a nih bakah tihsual langsar tak a neih leh avangin an sawi zui hi a mak hran lo.

Arsenal manager Arteta chuan, "Aaron khelh danah ka lawm, a chhan chu a theihtawp a chhuah a, amah hi mi ṭha tak a ni bawk. Ka sawi tawh ṭhin angin tihsual palh hi chu football-in a ken tel ve pakhat a ni.

"A bik takin goalkeeper tan tihsual neih a awl a, an awmna hmun hi a harsa lai ber a ni hial mai thei. Khatiang thil a thlen hnuah a rawn chet chhuah leh dan khan min tilawm," a ti. Arteta hian a naute chesual an awm pawhin a sawisel zui ngai lo.

A tihsual pakhat a langsar a, an lama lut tur ṭha tak tak a dante avangin fak a phu ve bawk. Heng bakah hian counter attack hlauhawm lutuk an neih theih nan forward Trossard tana ball fing a pek chhuahte chu sawi zui tham a ni.

Belgium international Trossard kha a tlan muang hret a, ball umtu kha che rang leh tlan chak Martinelli zawk chu ni se Ramsdale kha assist nei thei tur ang hial a ni a, a thutlukna siam kha a fuhin khingpui tan a hlauhawm hle.Chawlh zai rel lo Arsenal