Mizo hmeichhe footballer tan workshop

Mizoram Football Association hnuaia Women's Committee leh Women and Child Development, Govt. of Mizoram ten an huaihawt ni khat awh State Level Workshop on Sports & Gender - Challenges and Way Forward chu nimin khan sports minister Lalnghinglova Hmarin a hawng.

PHQ Multipurpose Hall, Aizawla hun hmanah hian district hrang hrang Football Association aiawha hmeichhe footballer kalkhawmte chu Lalnghinglova Hmar chuan hmeichhia an nih avanga inhmu hniam lo tur leh chutihruala indah sang kher lo turin a chah a. Mizoram hmun hrang hrangah hmeichhe footballer-ten inkhelh zirna hun an nei meuh lo tih a hriat thu te, tournament-ah chauh khelhna hun an neih ṭhin thute a hriatpui thu hrilhin, hemi aṭanga hmasawn tura ke an pen dawn thu a sawi.

Sports minister Tetea Hmar chuan, "Association a hausa si lo, game khelh induh si, a tam zawk Aizawl pawn lama cheng in ni a, hmelhriat loh inah in rawn thleng ṭhin a, inharsatna kan hriatpui che u a ni," tiin Women and Child Development-te nen thawkho zel a, eizawnna tling sports chu tihtak zeta kalpui tum a nih thu a sawi zui bawk.

Sports Minister chuan Home Minister hnenah Police hmeichhe football team din tura a ngen tawh thu sawi bawkin, "Kan harsatna hian hnualna thlen lo se, a sang ber kan thleng thei ang tih ka ring tlat a ni," a ti bawk.

Sports & Gender Workshop-ah hian MFA chuan India International football player Grace H Lalrampari, Cindy Remruatpuii Colney, C. Ramthanpuii, Lalduhawmi, B. Lalhriattiri, Offee Lalhmingchhuanpuii leh Gladys Zonunsangi te bakah National Referee pathum, Level 5 ni phak - F. Zohmingliani, Lalhruaizeli Khiangte leh Lalthansangi te, Mizo hmeichhe zinga AFC 'C' Coaching License nei awmchhun R. Lalnunsangi te hnenah chawimawina a hlan a ni.