Santosh Trophy Semifinal : Tlai dar 2:30-ah Mizoram Vs Services

77th National Football Championship for Santosh Trophy semifinal-ah Mizoram leh Services te chu vawiin tlai dar 2:30 hian Golden Jubilee Stadium, Yupia-ah an inkhel dawn. Zanin dar 7:00-ah Manipur leh Goa ten semifinal hnuhnung zawk an khel ang.

Semifinal lut team palite hi group stage-a pakhatna leh pahnihna ve ve an nih avangin 'dream semifinal' a tih theih. Chutihrualin final-a mipui hmuh chak chu Services leh Manipur ni loin Mizoram leh Manipur inkhel a ni thung.

Fixture fuh lo

Santosh Trophy-ah hian fixture a fel fai tawk lo. Group stage-ah Services hian chawhma dar 10:00-ah vek an khel a, chawhnu leh zanah vawi khat mah an khel lo. Mizoram hian zanah vawi khat an khel tih loh chu chawhma dar 10:00-ah vek an khel.

Services hian March 4, Thawhṭanni chawhnuah Railways hnehin semifinal an lut fel tawh a, coach Govindaraju Ramachandran hote hian first half-ah goal hnih an khung tawh avangin harsatna hranpa nei loin hnehna an chang.

Mizoram erawhin March 5, Nilaini zanah harsa takin Kerala an hneh hram a, penalty shootout an pet hmain minute 120 an khel a; Services aiin inpuahchahna/hahdamna hun darkar 30 velin an nei tlem zawk.

Services an ṭha

Services hi chu team nghet an ni a, tun season chhung ringawt pawhin team angin an khel ho tam hle. Coach Govindaraju Ramachandran hnuaiah Army team-in hmun pawimawh an chang a, hei vang hian player-te pawh an inhrechiang hle.

Qualifying round-a Mizoram an hneh hmain Durand Cup an khel ho a, final round hmain National Games khelin gold an la. Tun ṭumah pawh hian Amritsar an hmachhawn ṭuma starting eleven aṭangin player pakhat bak an thlak a rinawm loh.

Goalkeeper Abdul Kadir chu khawih chet thiang lo tia sawi theih a ni a, tlarhnungah Mizo tlangval Zothanpuia (Thangpuia) leh right back Shafeel te chu rinrawl an ni. Thangpuia kawppui Samamanda leh left back Boinao te match pawimawhah an khel vek bawk.

Group stage-ah veteran midfielder ṭha mi Christopher Kamei khel tam tawk lo mah se knockout-ah Railways lakah a khel tluan leh tawh a, Lethaolen leh Vijay ten an thlawp ang. Tlarhmaah Rahul, Samir Murmu leh Bidyasagar te chu an player pawimawh an ni a; player tlan chak Bikash Thapa chu bench-ah a awm rinawm mah se a pawimawh lo tihna a ni lo. Bikash tlan chakna hi Services-in hun tawp lamah an hmang ṭangkai ṭhin.

Mizoram hun?

Qualifying leh group stage an khelh dan thlir chuan Services hi chak tur zawka rinkai an ni. Chutihrualin qualifying round-ah chuan natural grass ṭha tawk loah khelh a ni a, ruah a sur bawk avangin a nal hle. Tun ṭumah erawh artificial turf thar ṭhaah khelh a ni dawn a, Mizoram tan ground chhuanlam a thiang tawh lo.

Mizoram coach Lalsangzuala Hmar chuan, "Semifinal-ah kan lungawi tur a ni lo. Services hi kan hneh lo nawn a nih chuan kan rilru na hi thawi dam mai mai a harsa dawn. Kan theihna zawng zawngin kan khelh a ṭul a, chak thei turin theihna pawh kan nei a ni," tiin Vanglaini a hrilh.

Final round-ah Mizoram winger Lalthankima leh Sawma Tlangte te an che ṭha a, mual sir aṭangin Mizoramin an nawr theih tawh dawn avangin Services tan buaina tham a tling dawn. Chutihrualin Services hmaa Mizoram an dam kim hman a pawimawh. Kerala hneh ṭuma inhliam R. Malsawmtluanga leh Lalengmawia te bakah damloh vanga inlan lo MS Dawngliana te an dam hman a ṭul dawn a, dam hman ta lo reng pawh ni se knockout stage-ah chuan eng pawh thleng thei a ni.

Services-in champion ngei tumin Itanagar-ah mi 32 an tir a, chutihrualin player 22 chiah squad-ah a ziahluh theih a; player 18 an hmang tawh a, heng zinga player 15 hian inkhel bul an ṭan tawh. Mizoramin coach chhiar telin mi 26 an tir a, player 22 zinga pakhat hi inhliam an ni thung. Player 21 ten inkhel bul an ṭan vek tawh a, a tawi zawngin coach-in a chhawr ngam tur vek player a thlang a tih theih.

Mizoram vanneihna chu Itanagar Mizo Welfare Association-in an thlawp ṭha a, an hotel-ah ṭum hnih fuihna thu an sawisak tawh a; an chet chhiat lai ber pawhin stadium-ah ṭha takin an au phur ṭhin. Mizoram manager K. Lalenghluna chuan, "Ṭawngṭaina kan ngaih pawimawh a ṭul a, Mizo mipuiin Pathian hnena engkim kan hlan hi a ṭul a ni," tiin Vanglaini a hrilh.

HEAD to HEAD 

2024 Santosh Trophy Qualifying:

Nikum October 15 khan GNDU Sports Complex, Amritsar-ah Services hian Mizoram hi 2-1 in an hneh. Inkhel hi tun ṭuma final round khel tur zawnna hi a ni a, Services hian 2-1 chauhin hnehna chang mah se inkhel an thunun hle. Services tan Samir Murmu-a'n first half-ah a khung a, Lalkhawpuimawia hmangin Mizoram sut mah se substitute Bikash Thapa-a'n Services chakna goal a khung. Services hi group hmahruaitu nichungin an tling a, Mizoram hi pahnihna ti ṭha pathum zinga telin an tling ta tho.

2016 Santosh Trophy:

Nagpur-a final round khelh ṭum khan Mizoram hi Services nen group khatah an awm a, group match hnuhnung berah team pahnih hi an inhmachhawn. Mizoram hian Services hi MS Dawngliana leh Lalkhawpuimawia te goal hmangin 2-1 in an hneh. Amaherawhchu inkhel result hian awmzia a nei tawh lo a, Mizoram an tla. Services erawh pahnihna nichungin semifinal an lut a, an champion zui bawk.

2014 Santosh Trophy:

Siliguri-a Mizoramin H. Vanlalthlanga hoa nomawi an chawi ṭum khan Mizoram leh Services hi group khatah tho an awm. Mizoram hian 4-1 zetin Services hi an sawp a; KC Lalchhuanmawia, Zico Zoremsanga, V. Lalṭanpuia leh Lalbiakhlua ten Mizoram tan an khung.