Odisha an tlawm ve ta

Indian Super League-ah match nga zet a zawna tlawm an neih loh hnuin Odisha an tlawm ve ta a, Chennaiyin chu 2-1 in an ngam lo. Chennai club tan Ankit Mukherjee chuan minute ruknaah goal hmahruai a khung a, Odisha hian Roy Krishna hmangin an chhanglet.

Team pahnih hian point an insem mai dawn emaw tih hnuah Jordan Murray a inlar a, hun pek belh minute linaah chakna goal a khung - Chennaiyin tan match hnih a zawna an chak loh hnua an chak ve lehna a ni a, playoff khelh pawh an sawi ri ve leh ngam ta.

ISL-ah hian parukna chinin playoff an khel dawn a, Chennai club hian parukna Bengaluru chu point thumin an phak lo mek a, match khatin an khel tlem bawk.

Playoff semifinal khel tura tling chiang tawh Odisha tlawm mah se, table chung ber an luah chhunzawm a, mahse, an hnuai chiaha awm Mumbai City nen an point hmuh zat a inang a, match khatin an khel tam bawk - Chennaiyin laka tlawm hi league hmahruaitu ni chunga league round khar an tumna kawngah a pawi thei.

Odisha tan K. Lalṭhathanga (Puitea) leh Isak Vanlalruatfela ten inkhel bul an ṭan a, Isak-a'n chance nei ṭhin mah se a chhawr thei lo - Jerry Lalrinzuala chu bench aṭanga luhtir a ni bawk.