Lyon an tlawm leh tawh

French club langsar ber pawl ni ṭhin Lyon tan season a fuh hleithei lo - Pathianni zan khan RC Lens chuan 3-0 in an sawp a, Ligue 1 table-ah 11-naah an awm mek!

Mikhual Lens tan Florian Sotoca, Elye Wahi (penalty) leh Kevin Danso te chuan goal khat ṭheuh an khung a, minute 84-naah Lyon right back Ainsley Maitland-Niles chu hnawhchhuah ni mah se chhuanlam a tling lo - an hnawhchhuah hma hian Lyon hian goal hnih an chhuah tawh!

Ligue 1 nomawi pawh vawi sarih ngawt chawi tawh Lyon hian tun season-ah coach pathum an nei tawh. Paris Saint-Germain coach hlui Laurent Blanc hoa bul ṭanin, September 11 khan an ban a, a aiah an player hlui Fabio Grosso an la lut.

Mahse, season hmasa lawka Serie B-a Frosinone champion puitu coach pawh hian a daih rei lo. November 30-ah ban lehin, a aiah hian academy coach Pierre Sage chu coach lailawk turin an la lut - Sage hnuaiah an insiamṭha hret a, Lens an hmachhawn hmaa an league match hnuhnung paliah an chak vek. Mahse, Pathianni zanah an tlawm leh ta a, Lyon tan season a fuh hleithei lo.