Napoli-in Juventus an hneh

Manager thar Francesco Calzona kaihhruaina hnuaiah Napoli-in hma an sawn zel a, Pathianni zan khan Serie A inkhelah team ṭha Juventus chu 2-1 in an hneh - European football khelh an beiseina an chhi nung ve leh ta.

Diego Armando Maradona Stadium-a inkhelah Napoli tan Khvicha Kvaratskhelia chuan first half-ah goal hmahruai a khung a, Federico Chiesa chuan minute 81-naah Juve tan a chhanglet. Goal luh hun thlirin team pahnih hian point an insem mai rinna a lian hman.

Mahse, Napoli-in ngaihdan dang an nei a, chak ngei an duh. Hun tawp hnaih lamah Victor Osimhen chuan penalty a hlawh chhuak a, amah ngeiin a pet zui. Juve keeper Wojciech Szczesny chuan hei hi dang mah se, a per lehlam chu Giacomo Raspadori chuan rang zetin a pet zui a, a goal chiang hle.

Juve tan Dusan Vlahovic chuan uiawm takin post a tihper a, hun pek belhah Daniele Rugani chuan hnai set sawt aṭangin a thlawh over bawk. A tawpah Napoli-in hnehna an chang a, Serie A table-ah pasarihnaah an inhlang chho - parukna Atalanta chu point thum chiahin an phak lo a, season thara European football khelh an beisei ve zel.

Season hmasa champion Napoli hian tun season-ah beisei an phak lo hle. Coach pathum an nei tawh a, February 19-a Francesco Calzona an lakluh hma khan Rudi Garcia leh Walter Mazzarri an ban tawh a, Slovakia coach Calzona hi season tawp thleng atan an la lut.

Calzona hnuaiah Barcelona (Champions League, 1-1) leh Cagliari (1-1) inhnehtawkpuiin, Sassuolo chu 6-1 in an sawp a, tunah Juventus 2-1 in an hneh leh ta.