Goal khung lo Barca an chelh

Kartawp La Liga-ah hmahruaitu Real Madrid chak zawh loh avangin Barcelona-in an inkar sawr zimna remchang nei mah se, an chhawr thei lo a, khualmualah Athletic Bilbao chu 0-0 in an inhnehtawkpui.

Valencia nen 2-2 a inhnehtawk Real Madrid beisei angin thil a thleng vek em ni chu aw, tih mai tur a ni a, Barca an chak zawh loh bakah table-a pahnihna Girona chu Real Mallorca chuan 1-0 in an hneh bawk.

Real hi anmahni hnaih bertu Girona aiin point sarihin an la sang zawk a, pathumna Barca hian point riatin an phak lo mek bawk - Catalan club hi chak ngat se, an inkarah point ruk chauh a awm ang a, La Liga hi 'hot' thar leh tur a ni a, mahse, Barca-in an hun ṭha neih an chhawr tlat lo.

Hetihlai hian inelna hrang hranga an match hnuhnung pasariha vawi khat chiah chak thei Atletico Madrid-in an mangchhiate thlah ṭan zai an rel a, an mikhual Real Betis chu 2-1 in hnehna hlado an chham khum ve leh ta.

Di hlui

Athletic Bilbao boss Ernesto Valverde hi Barcelona coach hlui a ni. Catalan club hi 2018 leh 2019 khan a zawnin league nomawi chawipui mah se, Barca-in lian ve tawk an inti a, Champions League-ah nomawi an chawi tel loh avangin January 2020 khan an ban.

Valverde-a'n a club hlui tun season-a a hmachhawn hmasak berah 1-0 in a ngam lo a, mahse, Copa del Rey quarterfinal aṭangin 4-2 in a pet chhuak a, La Liga-ah nomawi beiseina an neih thar leh lai takin an hliamah chi a phulsak leh ta - Di hlui nunrawng!

Bilbao hi an tumah an chiang - âtthlak taka Barca nawr ai chuan goal venhim mai chu thutlukna fing a ni tih an hria a, counter hmanga nawr let turin an inruahman. An beisei ang ngeiin an khel chhuak a, goal khung lo mah se Bilbao tan Barcelona chelh hi result ṭha a ni.

Catalan club tan hian Joao Cancelo chuan yard 40 vela hla aṭangin goal ropui khung theihna chance a nei a, mahse, Yeray Alvarez chuan goal line aṭanga lo pet chhuakin, Barcelona-in goal khung loin Bilbao an hawsan - midfielder pahnih Frenkie de Jong leh Pedri an inhliam tel bawk a, he thu buatsaih a nih lai hian an chawlh chen tur sawi theih a ni lo.

Inkhel dang

League table-a pahnihna Girona-in Real nena an inkar sawrzim theihna remchang nei mah se, khualmualah Real Mallorca an ngam lo a, 1-0 in an tlawm - Mallorca tan José Copete chuan inkhela goal awmchhun a khung.

Girona hi season ṭantira an league match hmasa pasarihah tlawm an nei lo a, match riatnaah Real tawngin, 3-0 in an tlawm. Hemi hnuah hian tlawm nei loin match 15 an kal tluang leh a, Real bawkin 4-0 in an tihtawpsak - Girona an insiamṭha leh ta rih lo a, an league match hnuhnung pathumah vawi hnih an tlawm ta.

Hetihlai hian Atletico Madrid-in an la chhe vek lo tih pholangin hnehna an chang ve leh ta a, 2-1 in mikhual Real Betis chu an hneh. Minute riatna lekah Betis defender-ten Memphis Depay-a cross chu an pet chhuak thei lo a, ball kal sual zelah keeper Rui Silva perin an lamah a lut.

Atletico tan Alvaro Morata chuan minute 44-naah khung belhin, tun season-a goal 20 a khungna chiah a ni. Betis hian minute 62-naah William Carvalho hmangin khung ve leh mah se, awmzia a nei phak lo a, 2-1 in Atletico Madrid an chak.

March 03, Pathianni Zan

Villarreal 5 - 1 Granada

VIL: Alexander Sørloth 7', 19', 66'; Étienne Capoue 32'; Goncalo Guedes 47'

GRA: Theo Corbeanu 90+1'

Atletico Madrid 2 - 1 Real Betis

ATM: Rui Silva 8'(OG); Álvaro Morata 44'

REA: William Carvalho 62'

Real Mallorca 1 - 0 Girona

MAL: José Copete 33'

Athletic Bilbao 0 - 0 Barcelona

March 04, Thawhṭanni Zan

(Result kan hre hman lo)

Osasuna 01:30 AM Alaves

Team Dinhmun

# Team Pld W D L GF GA GD Pts

1 Real Madrid 27 20 6 1 56 18 38 66

2 Girona 27 18 5 4 57 33 24 59

3 Barcelona 27 17 7 3 56 34 22 58

4 Atlético Madrid 27 17 4 6 54 29 25 55

5 Athletic Bilbao 27 14 8 5 46 26 20 50

6 Real Betis 27 10 12 5 32 28 4 42

7 Real Sociedad 27 10 10 7 37 29 8 40

8 Las Palmas 27 10 7 10 29 29 0 37

9 Valencia 26 10 7 9 31 31 0 37

10 Getafe 27 8 11 8 36 41 −5 35

11 Osasuna 26 9 6 11 30 37 −7 33

12 Villarreal 27 8 8 11 43 49 −6 32

13 Alavés 26 7 8 11 25 32 −7 29

14 Sevilla 27 6 9 12 33 40 −7 27

15 Mallorca 27 5 12 10 24 34 −10 27

16 Rayo Vallecano 27 5 11 11 23 37 −14 26

17 Celta Vigo 27 5 9 13 30 39 −9 24

18 Cádiz 27 2 13 12 18 38 −20 19

19 Granada 26 2 8 16 28 54 −26 14

20 Almería 27 0 9 18 25 55 −30 9