Mexican Open champion De Minaur

Tennis inelna Mexican Open khelh zawh takah Alex de Minaur chuan Casper Ruud hnehin a nomawi kawl lai a humhim, tun hnaiah vanduai thei viau mah se a tan hun ṭha a inherchhuak ve leh ta.

Kum 25 mi De Minaur hi a vanduai thei hle, final a khelh hnuhnung paliah a tlawm vek. Mexican Open final-ah erawh 6-4, 6-4 in a chungnung zawkah a ṭang a, ATP Tour title pariatna a hlawh chhuak.

Australian tlangval De Minaur chuan, "Chawlhkar nuam leh duhawm tak a ni. Tun hnaiah ka khelh ṭhat tawk ṭhin loh avangin Mexico ka pan dawn pawh khan inrintawkna ka nei sang lo, mahse beiseina tlemtê ka neih chu tihhlawhtlinsak ka ni.

"Ka tan chuan he hmun hi a hlu a, ka hmuh danah chuan final ka khelh dan kha chu tun season chhunga match ka khelh ṭhat ber ṭum a ni hial, chhawmnun ngei pawh ka tum ang," tiin a sawi.