Mbappe leh Enrique boruak a ring

Paris Saint Germain leh Real Sociedad ten Champions League last 16 first leg an khelh zawh hnuah lawkah chanchin langsar tak a awm a, an forward Kylian Mbappe-a chhuah tur thu a ni.

France captain Mbappe-a'n a chhuah tur thu a sawi hnuah boruak a danglam, inkhel bul ṭan ziah ṭhin Mbappe chu bench lama hun hmantir a ni zauh a, tun hnaiah minute 90 chhung a khel meuh lo - match hnuhnung pahnihah Randal Kolo Muani chuan a rawn thlak.

PSG coach Enrique chuan, "Hremna a ni em? tia zawhna ka dawng ṭhin, kei chuan ka player zingah hrem ngai an awm ka hre lo. Hei erawh ka hre chiang thung, chhuak tur an awm a nih chuan an tel loa khelh dan kan ngaihtuah a ngai thung.

"Kei chuan team tana ṭha ber tur ka ngaihtuah mai a ni a, midang ngaihdan hi lo hnial pawh ka tum hran lo. A ṭha ber tur ka ngaihtuah a, chumi tur ang chuan thutlukna ka siam mai ṭhin," tiin a sawi.

PSG hian zanin dar 1:30 hian Champions League last 16 second leg khel turin Real Sociedad an lenchilh dawn, an intawn hmasakah PSG hi 2-0 in an chungnung a, tlang turin goal chhuah tam loh a tawk.