Red Bull chhungkua an buai?

Formula 1 season thar an ṭan a, driver champion lai Max Verstappen chu a tlan chak ber - Red Bull driver hian a tir lama amah chhaih buai phak ve deuh Charles Leclerc tlan sanin hnehna a chang.

Mahse, Verstappen a chak avanga an lawm lai hian team chhungah boruak ṭha lo a awm nia sawi a ni. Tun hnai khan email kaltlangin thuruk ṭhenkhat a putru a, heng zingah hian Red Bull team principal Christian Horner chungchang pawh a tel.

Horner-a hi a thawhpui hmeichhiate lakah mawi lo taka che ṭhin anga sawina pawh a tel, hemi chungchangah hian Red Bull chuan thu belhchian dawn lo a nih thu an sawi bakah, an team principal hi an thlawp tlat tih an sawi.

Amaherawhchu, champion lai Max Verstappen-a pa Jos Verstappen ngaihdan erawh a ni thei lo. Jos chuan, "Hetiang thil chu chhunzawm chi niah ka ngai lo, a nihna takah chuan team hi dinhmun ṭha lo takah a ding mek.

"Horner hi thil tisualtu a ni a, a pawn lam lan danah chuan a tuartu angah a inchhuah leh daih," a ti. Horner chu bang loin a awm chhunzawm zel a nih chuan Red Bull team chu kehdarh mai thei dinhmunah an ding tih a sawi bawk a ni.

Max Verstappen chuan he thil thleng chungchangah hian engmah a la sawi ve lo. Hetihlai hian Red Bull thupuangtu chuan, "Buaina a awm hran lo e, team chuan intlansiak bak thil dang a ngaihtuah rih lo," tiin a sawi ve thung.

Kum 2005 aṭang khan Horner hi Red Bull tan a thawk tawh, hna a thawk ṭhain sulhnu ropui tam tak pawh a hnutchhiah tawh. A chunga thil thleng hi ani pawhin tihsual leh dik lohna a nei lo tih a sawi a, team lamin an thlawp ṭha rih

hle bawk.