Bayern tan goal khung ngei a ngai

Beisei anga season hmang ṭha tawk lo Bayern Munich chuan Champions League quarterfinal thlen an duh a nih chuan goal an khung ngei a ngai. Bavarians hian zanin dar 1:30 hian last 16 second leg khel turin Lazio an mikhual ang.

Italy rama an intawn hmasak ṭumin Lazio hi 1-0 in an chak a, goal awmchhun hi captain Ciro Immobile-a'n penalty aṭanga a khung a ni - Serie A club tan tlang turin an goal neihsa venhim mai a tawk thung, hna awlsam erawh a ni dawn lo.

Bayern Munich hian season 11 chhung an lak tawh Bundesliga title chu hloh thei dinhmunah an ding mek, anmahni aia team nem zawk Bayer Leverkusen hnuaiah an awm - an inkhelhna tur hi Allianz Arena a nih avangin beiseina erawh an la nei sang hle ang.

Thomas Tuchel-a nauten goal an mamawh a, striker Harry Kane chungah mawhphurhna a sang dawn - England captain hian champion duh vangin Bayern a zawm, hei vang tal hian goal khung a châk zual dawn.

Tottenham Hotspur striker hlui Kane hian tun season kal laiah Bayern tan inelna hrang hrangah match 32 aṭangin goal 31 a khung tawh, heng a goal khung zinga pali chu Champions League-ah a ni - Lazio tlarhnung an ven uluk a ngai hle ang.

Goal an nawr a ngai dawn a, hetih karah hian an tlarhnung hi a nghet tawk lo - hrem vangin Dayot Upamecano a khel thei dawn lo. Minjae Kim leh Eric Dier te chu inkawp tura ngaih niin, Matthijs de Ligt pawh khel thei tura beisei a ni bawk.

An league match hnuhnung bera an chak zawh loh avangin Bayern hi rin thiam an harsa, chutihrualin Jamal Musiala, Thomas Muller leh Joshua Kimmich te awmna an ni miau a, an khelh fuh ni chuan eng team pawh hneh thei turin theihna an nei sang.

Lazio hian goal khung kher loa tlang theih a ni tih an hrechiang, chutihrualin goal khung belh erawh an tum. Kar tawpa AC Milan nen an inkhelh ṭum pawhin Immobile chu an hahchawlhtir a, zaninah thapui thawh tir leh ngei an tum tihna a ni.

Goal khung ngei ngei ngai, goal khung thiam bawk Bayern Munich leh goal ven thiam vanga hriat hlawh ṭhin Italian club intawng tur hi a hmuhnawm dawn, khualmual leh mahni khelmuala goal khung hlut zawng a inang tawh tih erawh hriat a ṭha ang.