GSW hnehtu Boston Celtics

Nimin zing NBA regular season inkhelah Boston Celtics chuan Golden State Warriors chu 140-88 in an hneh a, tun hnai an match khelh hnuhnung 11-ah Celtics hi an chak vek a ni.

Jayson Tatum chuan a kum 26 tlin lawm nan point 27 a nei a, point 29 neitu Jaylen Brown nen an thawhhlawk hle - Eastern Conference hmahruaitu niin season duhawm an hmang mek.

Tun season chhungin Celtics hian chiang zet zeta chak hi an nei zauh zauh, an khingpuite point 50 chuanga hneh vawi thum ngawt an nei tawh. Basketball inelna sang berah hian season khat chhunga khingpuite point 30 chunga team pathum hneh thei hmasa ber an ni hial.

Hma an hruai fal tak tak lai chuan Celtics hian 48-12 tehmeuha san zawk lai pawh an nei a, chawlhlawk laia an san zawk dan chu 82-38 a ni hial, inkhel chawhnu lamah team pahnih hian an player ṭha ṭhenkhat an hahchawlhtir zui a ni.

Kum 26 mi Tatum chuan, "Khawvela fans ṭha berte hmaah ka piancham ka lawm thei a, ropui taka hnehna kan chan theih avangin ka lawm takzet," tiin a piancham lawm dan chu duhthusam a nih thu a sawi bawk.

Western Conference lama pakuana ni mek Warriors coach Steve Kerr chuan, "Rang taka theihnghilh daih tlak a ni. Boston khan an khel ṭha turu hle a, kawng engkimah khan tun ṭum atan chuan an ṭha zawk," a ti.

Nimin zing inkhel dangah San Antonio Spurs chuan Indiana Pacers chu 117-105 in an hneh. An chak theih nan hian Victor Wembanyama chuan point 31 a neih bakah rebound vawi 12 neiin assist ṭum ruk a nei bawk.

Western Conference hmahruaitu Oklahoma City Thunder pawh an chak - Thunder hian Phoenix Suns 118-110 in an hneh a, tun season chhungin vawi 42 an chak tlinna niin vawi 18 an tlawm ve tawh thung.