Champions League khelh kan tum - Ten Hag

Pathianni zan Premier League inkhelah Manchester City chuan 3-1 in Manchester United an sawp a, Red Devils tan season thara Champions League khelh beiseina a tlem sawt - mahse, coach Erik ten Hag erawh a beidawng ve lo.

Dutch coach chuan, "Thawklehkhatah thil hi a inthlak danglam hlawk thei a, kan hmabak zelah hnehna chan a, top four hnaih kan tum ang," a ti - mahse, a sawi leh a tak ram chu a inthlau hret mai thei.

United hi Premier League table-ah parukna an ni mek a, palina Aston Villa chu point 11-in an phak lo mek a, match 11 chiah khelh tur a awm tawh bawk. A tawi zawnga sawi chuan United hi an hmabak match-ah chak vek pawh ni se, Villa an chetsual viau a ngai!

Mahse, Ten Hag hian palina an ni phak lo a nih pawhin beiseina a nei a, Dutch coach chuan, "Pangana pawhin Champions League an khel thei mai thei a, chuti a nih chuan tha thlah miah loa kan beih zel a ngai a ni," a ti.

Champions League hi season tharah team 32 aṭangin 36-ah a tel thei tur zat tihpun a ni dawn a, Champions League-a team pali thawh thei England hian team panga thawhna chance an nei.

Chumi thleng tur chuan European football inelna pathum, Champions League, Europa League leh Europa Conference League-a Premier League club telte an chet ṭhat a ṭul a, an chet ṭhat chuan 'UEFA Performance slot' kaltlangin team pakhat Champions League-ah an neih belh thei dawn.

UEFA Performance slot-a top two ramte chuan Champions League-ah hian team an thawh belh thei dawn a, England club-ten top two-ah hmun an kharna tur chuan United elpui Manchester City leh Liverpool te ho an chet ṭhat a ṭul dawn.

Mahse, Premier League club pangain Champions League khel dawn pawh ni se, United tan hian hmabak a la ko tho - tun dinhmuna table-a pangana chu Tottenham Hotspur an ni a, United aiin point rukin an sang a, match khatin an khel tlem bawk!

Red Devils hian Villa bakah Spurs chetsual an chan tel a ṭul tihna a ni a, a tawi zawnga sawi chuan Ten Hag hian result ṭha bakah thil mak a beisei tel tihna a ni ber.

"Football hi ball chan tam ringawt a ni lo a, ni e, goal khung chu a ngai ngei alawm. Inkhel ṭantir lam minute 20 kha chu chance kan ngah zawk a, tlarhnung pawhin kan ti ṭha. Mahse, a pawimawh lai takin kan che fuh tawk ṭhin lo a, point thum emaw point khat tal pawh kan hlawh chhuak ṭep a ni."
- Erik ten Hag, United manager

"Chak lo ila chu a pawi ngawt ang. Mahse, kan phu ang ngeiin hnehna kan chang. Bul kan ṭan ṭha a, mahse, minute sarih hnuah khan kan tidik hleithei lo a, first half bikah khan goal hmaah kan hlauthawng tlat a, mahse, kan tiṭha e.
Liverpool, Arsenal leh Aston Villa te result hi kan tih theih piahlam a ni a, a pawimawh ber chu keimahni kan ni. Hnehna kan chan zel hi a pawimawh ber mai."
- Pep Guardiola, City boss