Man City-in Man United an nau en
Manchester United-a share nei thar Sir Jim Ratcliffe-a'n, "Manchester City rorelna hi tihtawp ka duh a ni," tiin an ṭhenawm club bengchheng chungchang a sawi a, Pathianni zana an inkhel aṭanga teh chuan a duhthusam hi a thleng rih lawk dawn lo niin a lang.
Pathianni zan khan Premier League-ah Manchester derby chhawpchhuahsak kan ni a, Liverpool leh Arsenal fan ten a vawi khat nan United ṭan rawn mah se, City lakah an chak zo chuang lo a, 3-1 in Red Devils an mualpho.
United hian Marcus Rashford-a goal ropui hmangin hma an hruai a, Liverpool leh Arsenal ṭantute nen United fans an lam ho. Mahse, naupangin aia upa a chhaih kawlh ang chauh a ni a, a let chu na tak a ni.
Phil Foden chuan player class bik a ni tih pholangin City tan goal hnih a khung a, Erling Haaland-a'n hun pek belhah a khung bawk - City-in pahnihnaah an dinhmun an sawh rem a, hmahruaitu Reds chu point khat chiahin an phak lo mek.
Ti ve zuai!
Season hmasa lawka United tana goal 30 khungtu Rashford-a'n tun season-ah beisei a phak lo a, Pathianni zana City an hmachhawn hma hian inelna hrang hrangah match 32 khelin goal nga chiah a la khung.
Red Devils ṭantuten an player hi an sawisel nasa a, tam takin United tana inpe tawk lo ang hialin an puh. English forward hi a ngawi reng thei bik lo a, "United tana ka inpekna inrinhlelh hun chu ka ngawih reng theih loh hun a ni ang," a ti a, a chhang let.
Rashford chuan, "Manchester-ah ka piang a, naupang tê ka nih aṭangin he club tan hian ka khel. United kawr hi chhuang taka ka hak theih nan, ka chhungte chuan kan nun thlak danglam hlawk thei tur khawpa tam pawisa an hnawl," a ti a, United tana a inpekna a sawi chhuak.
Heti chung hian United fan-te chuan khelmualah zawk anmahni chhanglet turin an beisei a, a chhanglet ta - Rashford hian minute riatna lekah Bruno Fernandes-a siamsak chu kawh pawtin a pet lut a, player class bik ke aṭanga chhuak a ni.
Mahse maw...
Etihad Stadium-ah City aiin United fans an bengchheng zawk a, mahse, an hlim chhung erawh a rei lo. Pep Guardiola nauten inkhel an thunun zui a, goal hmaah vannei ngat se, si phur chungin chawlhlawk an hmang kher lo ang.
Rodri-a shot chu United keeper Andre Onana chuan ṭha takin a dansak a, Foden-a ball siamsak chu Haaland-a'n goal ruakah a khung lo bawk! Mahse, City hi chelh reng theih an ni lo - minute 56-naah Rodri siamsak chu Foden-a'n nalh lutukin goal-ah a chantir a, minute 80-naah a belhchhah bawk.
A la tawk zo lo cheu. Goal ruaka khung lotu Haaland-a'n goal khung loh a duh lo a, hun pek belhah Rodri siamsak tho chu goal-ah a chantir. Red Devils tan thawh ngaihna a awm tawh lo a, City lakah 3-1 in an tlawm.
City boss Pep chuan goal hnih khungtu Foden fakin, "Enge ka sawi leh chuan ang? Tun dinhmunah chuan Foden hi a thiltihte avangin Premier League-a player ṭha ber a ni a, a awihawm loh zawk a ni," a ti a, fakna sang tak a ni.
March 03, Pathianni Zan
Burnley 0 - 2 AFC Bournemouth
BOU: Justin Kluivert 13'; Antoine Semenyo 88'
Manchester City 3 - 1 Manchester United
MNC: Phil Foden 56', 80'; Erling Haaland 90+1'
MNU: Marcus Rashford 8'
Team Dinhmun
# Team Pld W D L GF GA GD Pts
1 Liverpool 27 19 6 2 64 25 39 63
2 Manchester City 27 19 5 3 62 27 35 62
3 Arsenal 26 18 4 4 62 23 39 58
4 Aston Villa 27 17 4 6 59 37 22 55
5 Tottenham Hotspur 26 15 5 6 55 39 16 50
6 Manchester United 27 14 2 11 37 39 −2 44
7 West Ham United 27 12 6 9 43 47 −4 42
8 Newcastle United 27 12 4 11 57 45 12 40
9 Brighton & Hove 27 10 9 8 49 44 5 39
10 Wolves 27 11 5 11 40 43 −3 38
11 Chelsea 26 10 6 10 44 43 1 36
12 Fulham 27 10 5 12 39 42 −3 35
13 Bournemouth 26 8 7 11 35 47 −12 31
14 Crystal Palace 27 7 7 13 32 47 −15 28
15 Brentford 27 7 5 15 39 50 −11 26
16 Everton 27 8 7 12 29 37 −8 25
17 Nottingham Forest 27 6 6 15 34 49 −15 24
18 Luton Town 26 5 5 16 37 54 −17 20
19 Burnley 27 3 4 20 25 60 −35 13
20 Sheffield United 26 3 4 19 22 66 −44 13