Santosh Trophy quarterfinal : Zanin dar 7:00-ah Mizoram vs Kerala

77th National Football Championship for Santosh Trophy 2023-24 quarterfinal-ah zanin dar 7:00 hian Mizoram leh Kerala te an inkhel dawn. Tlai dar 2:30-ah NorthEast derby hmuh tur a awm dawn a, Manipur leh Assam te an inkhel bawk ang.

Golden Jubilee Stadium, Yupia-a inkhel hi Arunachal Pradesh Football Association YouTube channel-ah a en theih. Mizoram hi pahnihna ni chunga group stage paltlang an ni a, Kerala hi group stage-ah pathumna an ni thung. Chutihrualin Kerala hian Mizoram hi an inhmachhawnna hnuhnung pathumah an hneh vek.

Dawngtea a damlo

Mizoramin group stage-ah match nga an khel a, Bawngkawn striker MS Dawngliana a khel kim vek. Dawngtea hian Karnataka nena inhnehtawk ṭumin nalh zetin a volley lut a, Delhi an sawp ṭumin ṭha zetin a ke chhip goal leh bawk.

Inkhel dangah pawh no. 10 hna chelhtu Dawngtea hi a pawimawh ṭhin a, match hnuhnung bera Railways 4-0 a an hneh ṭumin assist vawi hnih a nei a; AIFF website pawhin man of the match-ah an thlang.

Mahse, nimin zingah MPL10-a Chhinga Veng captain Dawngtea hi khawsik vangin team zingah thingpui a in thei lo. Vawiin lama a dam ṭhat hman chuan zanin lama bul a ṭan tho erawh a rinawm.

An dam ṭan

Mizoram team dam kim lo mah se player inhliam neuh neuhten ngai an awh ṭan. MPL10 best player H. Lalbiakthanga (khawsik/chawn na) pawhin training a zawm leh thei tawh a, Lalrinzuala ke rek na pawh a ziaawm tawh a, inhliam chunga Railways hmachhawn R. Malsawmtluanga pawhin harsatna a nei tawh lo.

Chutihrualin ke ruh khi vanga inlan thei lo Lalnunzama a dam hman dawn lo tih a chiang tawh a, tun ṭum Santosh Trophy-ah Mizoram team ṭha ber erawh hmuh theih a ni dawn ta lo.

Group stage-ah Mizoram player zingah red card hmu an awm lo a, yellow card vawi hnih hmu an awm loh bawk avangin quarterfinal-ah hrem an awm lo. Mizoram manager K. Lalenghluna chuan, "Kerala hi an ram ngeia kan hneh loh ṭum khan Mizoram Manager ka ni a, hneh loh nawn hi ka duh lo a ni. Coach Sanga pawhin vawi hnih a lo hneh tawh lo a, vawi thum hneh loh hi a hreh takzet. Chutihrualin phuba lam kan ngaihtuah lo a, semifinal kan thlen theih nan Kerala hneh hi kan duh a ni," tiin Vanglaini a hrilh a, Mizo mipuite ṭawngṭaipuina a ngen tel bawk.

Kerala lam hi

Santosh Trophy-a vawi 15 final lut tawh leh vawi sarih champion tawh Kerala hian Mizoram aiin ni khatin hahdamna hun an ngah zawk a, chutihrualin Kerala hian match hnihnaa malpui hliam vanga an lakchhuah Nijo Gilbert chu group match hnuhnung bera Services an hmachhawn ṭum thlengin an la chhawr lo.

Kerala hian quarterfinal lut tur hian goal sarih an khung a, goal hnih khungtu Sajeesh chu group stage-ah yellow card vawi hnih a hmuh avangin Mizoram hmachhawn lo tura ngaih a ni.

Satheevan Balan-a kaihhruai team hian Gilbert leh Sajeesh hi chhawr thei lo pawh ni se team ṭha tak an la ni a, kum tina team ṭha pawl ni thei reng an ni. Nikum khan final round-ah group stage an paltlang loh avangin India U19 coach hlui Satheevan hi an ko let a, ani ho hian kum 2018-ah khan an champion.

Kerala Football Association hian 2021-a champion puitu Bino George leh Kerala Blasters assistant coach TG Purushothaman te aiah Satheevan hi an thlang a ni a, quarterfinal-ah an lungawi dawn lo. Mizoram hneh ngei tumin Kerala hi Golden Jubilee Stadium-ah an lut ang.

Head to Head

Kum 10 chhung Santosh Trophy-a Mizoram leh Kerala inkhelh tawhna thlir chuan Kerala an chungnung zawk. Kerala hian match hnuhnung pathumah hnehna an chang vek a, ṭum hnihah hian tun ṭuma Mizoram enkawltu Lalsangzuala Hmar-in team a kaihruai. Chutihrualin H. Vanlalthlanga hoin Mizoram hi ṭum hnihah vawi hnih an chak a, Santosh Trophy-a an intawn hnuhnung pangaah vawi hnih Mizoram an chak a, Kerala hi vawi thum an chak thung.

January 8, 2023 : Nikum Santosh Trophy group stage-ah Mizoram leh Kerala te hi group khatah an awm a, group match hnuhnung berah an inhmachhawn. Team pahnih hi an intawn hmain vawi li ve ve an chak tawh.

EMS Stadium, Kozhikode-ah mualneitu Kerala an chungnung a, 5-1 in hnehna an chang. Mizoram tana goal awmchhun hi minute 80-naah Malsawmfela khung a ni a, mualpho lutuk tur hliahkhuhna chauh a ni. Mizoramin Kerala laka point an hlawhchhuah loh avangin final round an khel pha lo.

March 30, 2018 : 2017–18 Santosh Trophy-ah khan Mizoramin final round an lut a, coach Lalsangzuala Hmar hoin semifinal an thleng. Mohun Bagan Ground, Kolkata-ah Mizoram chungnung zawk mah se Kerala-in Afdal V.K hmangin minute 54-naah an khung a, Mizoramin a chhanletna an nei lo.

March 19, 2017 : 2016–17 Santosh Trophy-ah Mizoram leh Kerala te hi group khatah an awm a, Tilak Maidan Stadium-ah Mizoram hian Kerala hi 4-1 ngawtin an hneh lo. Hemi ṭum pawh hian Lalsangzuala Hmarin Mizoram team hi a kaihruai a, Kerala hneh lo mah se group stage paltlangin semifinal an lut ta tho.

March 5, 2015 : 2014–15 Santosh Trophy-ah H. Vanlalthlanga hoin Mizoramin nomawi humhim ngei tumin Punjab an pan. Hemi ṭum hian Mizoram leh Kerala hi group khatah tho an awm a; Guru Gobind Singh Stadium, Jalandhar-ah F. Lalrinpuia (Valpuia) goal hmangin Mizoramin 1-0 in hnehna an chang.

February 24, 2014 : Mizoramin H. Vanlalthlanga hoa 2013–14 Santosh Trophy-a an champion ṭum khan Lammualah qualifier an khel a, final round-a an hmachhawn hmasak ber chu Kerala a ni. Kanchenjunga Stadium, Siliguri-ah Mizoram tan Lalbiakhlua, Zico Zoremsanga leh F. Lalrinpuia ten an khung a, 3-1 in hnehna an chang.