Juve player an fihlim vek

Italian champion Juventus player zawng zawng chu Covid-19 an kai em tih enfiah an ni a, hripui lakah hian an fihlim vek. Kar leh aṭanga chuan team training pangngai neih theih tawh an inbeisei.

Turin club chuan thuchhuah siamin, "Tuna thu thar berah chuan player zawng zawng hri leng lakah an fihlim vek, tun aṭanga rei loteah training pangngai zawk kan nei ang," an ti. Juve player pathum chu March thla khan coronavirus vang hian enkawl an lo ni tawh.

Juventus hian tun kar chhung khan Continassa-ah training an kalpui reng, player hi a huhoa awm loin mimal training neihtir an ni. Hlawm hrang hrangah ṭhen darh an ni bawk a, sokar thupek chu an theih chin chinah an zawm vek.

Hri leng laka an fihlim bakah, Italy sorkar lamin team training pangngai neih an phal tawh avangin kar leh lamah chuan tun hma lama training hautak deuh an neih ang kha an kalpui leh tawh a rinawm.

Serie A khelh chhunzawm leh hun tur hi tih chian a la ni lo. Italian Football Federation (FIGC) chuan August 20 chu league khelh zawh hun tur a nih thu an ti chiang tawh thung a, Sptember thlatir lamah season thar an ṭan leh bawk ang.



Share this Post

Login to comment
No Comments