LeBron James hoin Lakers an chak

Los Angeles Lakers chuan point 21 ngawta an hniam hnuah Los Angeles Clippers chu 116-112 in an hneh a, hnehna an chan theih nan LeBron James-a'n point 34 tehmeuh a nei.

Kum 39 mi James hi a vanglai liam deuh tawh mah se a hunah tak mamawh chhanna a la ni reng. Point 34 a neih zinga 19 chu quarter hnuhnung bera a neih niin; Clippers lamin 98-77 a hma an hruai tawhna chu a pawtthla.

James chuan, "Hun pawimawh laiah mawhphurhna ka chungah a tla a, chumi ka hlen chhuah theih avang chuan ka lawm. Theih ni se la chuan tuna ka hlimna ang hi damchhunga neih mai pawh ka duh, ka ṭhiante min puihna avangin lawmthu ka sawi," a ti.

Lakers tan James bakah hian Anthony Davis chuan point 20 a neih bakah rebound vawi 12 laiin double-double a nei bawk. Clippers tan point 26 neitu Kawhi Leonard langsar ve mah se a team a chakpui zo ta lo.

Nimin zing NBA inkhel dangah Dallas Mavericks chuan Toronto Raptors 136-125 in an hneh. Mavericks an chak theih nan Luka Doncic chuan triple double (30 points, 11 rebounds leh 16 assists) a nei.

Nikola Jokic pawhin a team Denver Nuggets chu Sacramento Kings lakah 117-96 in a chakpui. Jokic hian basketball a khelh hun chhunga a vawi 124 nan triple double a nei - point 14 neiin rebound vawi 14 bawk a la, hei bakah hian asist ṭum 11 a nei bawk.