City hmachhawn turin United an inbuatsaih

Premier League-a an match hnuhnung berah 2-1 a Fulham an ngam loh hnuin Manchester United an insiamṭha lehnghal a, FA Cup fifth round-ah Nottingham Forest chu 1-0 in an hneh.

Red Devils tan Casemiro chuan inkhela goal awmchhun a khung a, a goal khung hi minute 89-naa a khung a ni - Forest tan chhanglet turin hun a tam tawk tawh lo a, an mikhual lakah an tlawm.

Pathianni zan dar 9:00-ah Manchester United hian derby khel turin Manchester City an lenchilh zui dawn a, Pep Guardiola naute an hmachhawn hmaa an match hnuhnung berah an chak avangin an inringtawk sawt ang.

A rei lua!

August 2022 khan United-in pound maktaduai 82-in Antony an la lut a, mahse, Brazilian forward hian Red Devils a zawm hnuah match 70 khelin goal kua chiah a la khung - hei vang hian sawisel a tawk nasa a, Forest nen an intawn hma pawhin coach Erik ten Hag-a'n media hmaah a chhan a ngai hial.

Dutch coach hian a plyer chungah rinna nghat luiin, bul a ṭantir a, mahse, chance ṭha a nei chungin Antony hian a pu rinna a chhang thei lo - inkhel ṭantir lama a chance neih chu crossbar a tihper a, ven loha a awm chungin Forest keeper Matt Turner zawnah tak a tauh bawk.

Forest tan Divock Origi leh Taiwo Awoniyi ten chance an nei ve bawk a, mahse, player pahnih hian United keeper Andre Onana an paltlang thei bik lo.

A tawpah United

United tan Scott McTominay leh 'reh' tak Marcus Rashford ten chance an nei ve bawk a, an chhawr thei bik lo - United fan-ten goal hmu turin an nghak rei. Minute 89-naah Casemiro a inlar a, Bruno Fernandes-a freekick aṭanga ball kal chu a tauh lut.

Red Devils-in Casemiro goal khung an chakpui a, Ten Hag a pawr nghal hle. Dutch coach chuan, "Kum 2024-ah vawi khat chiah kan la tlawm a, kan khel ṭha tluang hle. Kan player siksawi nual a ngai a, a awlsam lo hle. Mahse, hnehna kan chang a, ka naute ka chhuang a ni," a ti.

United-in kum 2024-ah inelna hrang hrangah match kua an khel tawh a, vawi sarih chakin, vawi hnih an draw a, Fulham lakah an tlawm - City-in an lo hmuak a, FA Cup-ah Liverpool an hmachhawn dawn bawk!