Greek tlangval, tennis player beisei awm tak Stefanos Tsitsipas chuan coronavirus vanga inkharkhip chu hrehawm hle mah se khawvel tan a ṭha hlea a hriat thu a sawi chhuak.

March thla aṭang khan tennis inelna a awm tawh lo, a hma berah August thla hma chuan tournament khelh tur pawh a awm dawn lo. Player upa tawh tan hun ṭha a uiawm a, player naupang deuh tan pawh dinhmnuh sawhngheh theihna hun a liam ve tho.

World number 6 Tsitsipas chuan, "Kum tin hian inkharkhip hun hi vawi khat awm ṭhin se la chuan khawvel tan hian a ṭha ngei ang, boruak a thiang nuamin a ralmuang a, chhungkua a hun hman theihna hun ṭha a ni bawk.

"Tennis khel thei lo mah ila thil tam tak kan ti thei tho a, midang tana thil ṭha tihna hun ṭha pawh a ni thei. Nitin hian tournament khel thei turin inbuatsaihna chu ka nei ziah a, tennis khelh hun tur a la chian loh avangin rilru zawng zawnga inbuatsaih erawh a harsa," a ti.

Kum 21 mi Tsitsipas hian season hmasa khan Australian Open-ah Roger Federer hneh in semifinal hial a thleng tawh, clay court inelna lianah pawh last 16 thleng mah se champion hlui Stan Wawrinka a ngam lo thung.

Grand Slam chungchang zawhna chhangin Tsitsipas chuan, "Player ṭha leh tawnhriat nei Roger ka hneh a, mahse a hnu lamah Rafael Nadal ka ngam lo. Paris khawpuiah Stan ka hneh lo bawk, ka rilru chu na viau mah se beiseina ka insiamsak lui hram hram ṭhin," a ti.

---

Share this Post