Premier League hnuai lam zawnga English professional club-te inelna English Football League chuan Covid-19 vangin season tihtawp lo ṭul ta pawh ni se promotion leh relegation chu kalpui tur a nih thu an sawi. 

Hei mai hi a ni lo - playoff khelh ṭhin pawh season dang ang thoin khelh a ni ang a, mahse team pali aia tamin playoff an hmachhawn thei lo thung ang. 

EFL chuan season titawp tur erawh erawh chuan an hnuaia awm Championship, League One leh League Two club zinga 51% talin season tihtawp an thlawp a ngaih thu an sawi. 

League One a tawp dawn?

EFL-in promotion leh relegation an kalpui tur thu an sawi avangin League One tan chuan season kalpui chhunzawm aiin tihtawp chu a hnai zawk niin a lang. 

Kar hmasa khan League One club-te hi an inrawn tawh a, mahse club paruk Peterborough United, Oxford, Sunderland, Fleetwood, Portsmouth leh Ipswich-te chuan season kaltlangpui an duh avangin inbiakna hi an titawp. 

League kal zel dan turah hian vote thlak leh tur a ni dawn a, Portsmouth chuan league khelh chhunzawm lam hi an la thlawp dawn niin an sawi a, thutlukna hriat a châkawm tawh hle. 

League Two a tawp tawh

May 15 khan League Two club-te chuan league titawp turin thu an lo rel tawh a, hetihrual hian table mawng lama awmte chu National League lama relegate lo turin an rel bawk. 

Mahse, EFL-in promotion leh relegation a awm tur thu a sawi takah chuan Stevenage chu non-league lama tla thei dinhmunah an ding mek a, Swindon, Crewe leh Plymouth-te chu League One lamah an chho thung ang. 

League One-in tawp lam an hnaih a, League Two a tawp tawh bawk - Championship erawh Premier League ang thoa kal an tum a, June-ah chuan league khelh chhunzawm theih an beisei. 

EFL thu chhuak

English Football League thuneitute chuan league hi tihtawp an nih chuan points-per-game chu table-a team awm dan tur rel nana hman an rawt a, he rawtna hi club-ten an pawmpui a ngai thung ang. 

Scottish Premiership chuan point hmuh zat chawhrual hmang hian season an lo titawp tawh a, EFL chuan hei hi hman ve theih an inbeisei. Tarlan tawh angin playoff erawh khelh tho tum a ni a, an khel thei ta lo a nih pawhin EFL board lamin hmalak dan tur an ngaihtuah ang. 

EFL chuan thuchhuah siamin, "Relegation leh promotion siam hi Premier League aṭanga National League thleng tan a ṭha a ni," an ti a, EFL chairman Rick Parry chuan, "Club zawng zawng lungawina tura thutlukna siam chu a harsa ang tih kan ring. Mahse, league leh member-te tana ṭha tur ngaihtuaha thutlukna siam vat erawh a pawimawh a ni," tiin a sawi ve bawk.

---

Share this Post