MLS club FC Cincinnati chuan Ningani khan Manchester United leh Netherlands defender hlui Jaap Stam chu head coach atana a lak ngheh thu an puang. Stam hian a hnampui Ron Jans a thlak a, Jans hian February thla khan player hmaah chi leh chi inthliarna lam hawi a lam rik avangin a bang. 

Stam chuan, "Ka tan chuan America rama hna thawh a, MLS club FC Cincinnati hi thu lawmawm a ni. He ram hi ka ngaina a, a mipuiin hlawhtlinna chang tura an rilru put hmang hi ka duh zawng a ni," tiin a sawi. Kum 47 mi Stam hian kum 2021 thleng contract a ziak a, kum khat dang pawhsei dan a awm bawk.

Cincinnati tan 2019 MLS-ah khan vawi ruk chauh hnehna an chang a, vawi ruk inhnehtawkin vawi 22 lai an chak lo a, table mawngphahah an awm. Tun season MLS-ah pawh vawi hnih an khelh tawhah an la chak lo ve ve a, Covid-19 vangin inelna chhunzawm theih a ni lo.

Stam hi player a nih laiin PSV Eindhoven aṭangin hming a chher ṭan a, Manchester United an treble champion ṭum khan player pawimawh a ni a, hemi hnu hian Italian club Lazio leh Milan tan khelin an ram club Ajax-ah a hun tawp a hmang. Kum 2007 khan football khelh a chawlhsan a, club hrang hrang PEC Zwolle, Jong Ajax leh Feyenoord te a enkawl tawh.

Kum 47 mi Stam hian manager a nih hnuah hlawhtlinna lian tham a la chang lo a, a club enkawl hnuhnun ber Feyenoord-ah pawh season khat a daih lo. Nikum October thla khan Ajax 4-0 in an hneh lo a, beisei ang result a hlawhchhuah loh avangin a bang.

---

Share this Post