Ramhlun North-in Bawngkawn an pet chhuak

Mahindra XUV 300 LPS Cup Inter Village Football Tournament 2024-ah result a ngaihnawm chho zel a, nimin round of 32 inkhel ngaihven hlawhah Ramhlun North chuan 4-1 in Bawngkawn an hneh!

1st Bn. MAP Ground, Armed Venga inkhelah Ramhlun North tan Vanlalhruaia leh Lalhriatpuia Pautu ten goal hnih ve ve an khung a, Bawngkawn tan hun pek belha Vanlalawmpuia goal khung chu mualpho zualpui khuhna chauh a ni.

Team langsar Lengpui pawhin round of 32-ah inelna an mangṭha a, Sihphir Venghlun lakah goal an khung thei lo. Team pahnih hi 0-0 in an inhnehtawk a, penalty-ah 5-4 in Sihphir Venghlun an chak.

Durtlang pawhin champion an tum tih pho-lang nawnin, Tuikual South chu 2-1 in an hneh. Tuikual South hian PC Lalruatdika hmangin goal khung hmasa zawk mah se, Samuel Lalhmangaihzuala leh Lalrinsanga hmangin Durtlang hian an chhanglet a, round of 16 an lut.