Bayern Munich tan phuba lak theihna hun

Zanin dar 10:00 hian Bayern Munich chuan Eintracht Frankfurt an mikhual dawn a, coronavirus len hma lama chiang taka an ngam loh club hi hripui len hnuah hneh let an tum ang.

Frankfurt hi tun season Bayern dinhmun sawi danglam dawrhtu an ni, boruak nuam tak hnuaiah inkhel tur ni se chuan Allianz Arena-ah mipui an khat hneh khawp ang; mahse hri leng vangin a hmunah entu an awn dawn lo - Mizo leh German tlangval ten TV aṭangin kan en ho dawn.

Mangchhia

Nikum November thlatir kha a ni a, Eintracht Frankfurt khelmual Commerzbank Arena-ah Bayern an lenglut; minute kuana lekah defender Jerome Boateng chu hnawhchhuh a ni, a hnu lam chu German champion mualphona hlir a ni.

Frankfurt hian 5-1 in hnehna an chang, striker Robert Lewandowski goal khat khung chu malpho hliah khuh nan a tawk zo lo; zahna nen khelmual an chhuahsan a, hetihlai hian table-ah palina an nih avangin an nomawi kawl lai a him lo hle bawk.

German champion hian indin thar an mamawh a, an mualpho hnu lawkah hian manager Niko Kovac chu an ban. Borussia Monchengladbach, Borussia Dortmund leh RB Leipzig hnuaia awm kha Bayern thuneitute tan a tlawm thlak a ni.

Hei le Flick

Croatian coach Kovac a chhuak a, a hmun ruak luah lailawktu chu assistant coach Hansi Flick a ni. Flick hian tun hmain ama pualin team lian a la enkawl ngai lo a tih theih - club thunenitu lam pawhin November leh December thla chhung atan an ruai phawt.

Bundesliga mai ni loin Champions League thlengin Flick kaihhruaina hnuaiah result an nei ṭha, thuneitu lamin season tawp thleng an rawih tur thu an sawi. League-ah hmahruaitu an ni leh tawh, UCL quarterfinal leh German Cup semifinal hial an luh meuh chuan 2023 thleng daih contract a ziak ta.

Kovac kaihhruaina hnuaia an ngam loh Frankfurt nen an intawng leh dawn ta, manager thar Flick enkawl an nih avangin Bayern hi an danglam tawh dawn. League table-ah pawh an intawn hmasaka palina leh parukna kha, tunah chuan pakhatna leh 13-na an ni tawh - boruak a danglam tawh ang.

Bayern tak tak

German manager Flick-a'n Bayern a tuaihriam meuh chuan Thomas Muller-a'n ngai a awh leh tawh a, rawlthar Serge Gnabry a vul bakah striker Robert Lewandowski chu 'Goal machine' dik tak a ni leh tawh.

Frankfurt tan Flick-a naute dan hi a awlsam dawn lo, 2020 bikah point 36 hmuh tur awm aṭanga point 34 hmu thei an ni; Bundesliga club zingah kumin bika chak loh la nei lo awmchhun an ni bawk. Hei erawh hriat tel a ṭha, Frankfurt hi tun season chhunga German champion hneh thei team pali zinga pakhat an ni.

Kum 55 mi Flick chuan, "Thil chiang sa a awm lo, kan khelmuala inkhel tur ni mah ila fans an awm dawn loh avangin kan dinhmun a in ang reng. Allianz Arena a nih avang erawh chuan kan hre bel zawk a, inrintawkna kan neih san bawk avangin point thum kan beisei ang," tiin a sawi.



Share this Post

Login to comment
No Comments