Liverpool an chak - an hmaah United!

League Cup champion Liverpool-in season khata nomawi pali chawi an beiseina chu an chhawm nung zel a, Nilaini zan khan FA Cup round of 16-ah 3-0 in Southampton an hneh - quarterfinal-ah hian hmelma kumhlun Manchester United nen an intawng ang.

Jurgen Klopp-a'n hliam vangin senior player chhawr thei lo nual mah se, a buai phah lo a, an club academy lam hawiin, League Cup final ang thoin a nauten an tibeidawng lo - Jayden Danns chuan goal hnih khungin, Lewis Koumas chuan goal khat a khung bawk.

Liverpool tana goal khungtu player pahnih hi kum 18 mi ve ve an ni a, FA Cup quarterfinal-ah Liverpool an hruai thleng ta der - February 28, Nilaini zan hi an hre reng tawh ang.

A hming Koumas

Liverpool-in hliam an ngah miau a, coach Jurgen Klopp-a'n duhthlan tur dang a nei lo. Southampton lakah kum 21 hnuai lam player parukin inkhel bul an ṭan a, an mikhual hi Championship club ni mah se, Reds fan-te an hlauthawng.

Mahse, Saints lam ke hmui zan a ni lo a, an chance neih goal-ah an chantir thei tlat lo. Sekou Mara chuan chance nei mah se, League Cup final-a che ṭha tak Caoimhin Kelleher chuan a dansak ve ve a, Kamaldeen Sulemana chuan post a tihper bawk.

Liverpool hian minute 44-naah goal an khung ve chauh a, a khungtu hi kum 18 mi Koumas a ni. Wales international hlui Jason Kouma fapa hian Liverpool tana a match khelh hmasak berah goal a khung nghal - a siamsaktu chu kum 19 mi Bobby Clark a ni.

Hriatreng tur Danns

Second half-ah Liverpool-in goal hnih an khung zui - goal khungtu pawh rawlthar tho a ni a, a hming chu Jayden Danns a ni. Kum 18 leh ni 43 mi forward hian minute 73-na leh 88-naah a khung a, November 1997-a Michael Owen hnua Liverpool tana match khata goal hnih aia tam khung thei naupang ber a ni.

Reds tana a match thumna khel ve chauh Danns chuan, "Ka nuna ka hun tawn hlimawm ber a ni. Naupangtê ka nih aṭangin Liverpool inkhel ka en ṭhin a, Reds ṭantute hmaa goal khung hi ka duhthusam ai pawha sang zawk a ni. Movie chang ang mai ka ni - goal khat pawh ka hlimpui tehlul nen, goal hnih ka khung a nia!

"Liverpool tana ka khelh hmasak ber khan ka pa chu a ṭap a, tunah hian engtiangin nge a awm ang ka hre lo," a ti - Liverpool tan hian bench aṭangin kum 16 leh ni 243 mi Trey Nyoni chu minute 78-naah luhtir a ni a, Reds tana a match hmasa ber niin, FA Cup-a Liverpool tana inlan thei naupang ber a ni.