Manipur lakah Mizoram an zawr

FIFA Santosh Trophy 2024-a inkhel ngaihven hlawh berah Mizoram an mualpho a, an elpui Manipur lakah 4-1 in an tlawm. Manipur-in inkhel bul an ṭan ṭha a; Leimajam Sangkar Singh leh Phijam Sanathoi Meetei te hmangin first half-ah goal an khung. Second half-ah Pebam Renedy Singh-a'n goal thumna khungin Mizoram tan Malsawmzuala Tlangte-in goal khat khung ve bawk mah se Sanathoi Meetei-a'n Manipur goal lina a khung.

Delhi lakah Mizoramin 5-1 ngawtin hnehna chang mah se inkhel pawimawh zawkah an theihna an lantir thei lo a, Manipur lakah an zawr. Mizoram team hian quarterfinal lut turin beiseina la nei bawk mah se match li leka goal 10 ngawt an chhuah avangin knockout stage lut tur chuan tlarhnung siamṭhat a ngai nasa hle.

Nimin tlai inkhelah Railways-in champion lai Karnataka 1-0 in an hneh a, point sarih an hmu. Quarterfinal lut turin Manipur an tling a; Mizoram tan pawh beisei tur a la awm - match hnuhnung bera Railways an hneh hrim hrim chuan knockout stage an lut ang.

Buaina tenau

Mizoramin ni hnih chawlh an hmang ṭhaah an inngai a, inhliam te pawh an dam hmana ngaih a ni. Mahse, Hotel Tsangpo-a zing thingpui an in laiin coaching staff-ten defender Ephraim Lalremtluanga inhliam an hre chauh. Ephraim hi ke pilh vanga a khelh theih loh avangin chawpchilhin Laltluangliana chu khel tura dah luh a ni. Training session hnuhnung bera vei lam aṭanga attacking zir chu a hlawhchham nghal.

Midfielder H. Lalbiakthanga chu ni hnih chawlha ni hmasa zawkah chawn hliam vangin a training thei lo a, ni hnihnaah training a zawm. MPL10 best player BT-a pawh hi inkhelhtir lamah a chawn an tauh sak avangin tlan a harsat a, Mizoram midfield a thawl phah a, first half-ah thlak a ngaih phah bawk.

A goal awlsam

Mizoramin inkhel bul an ṭan fuh lo a, Manipur an insiamrem hmasa zawk. Mual laiah Mizoramin ball an hloh awlsam a, Manipur-in counter attack-ah an vaw let na hle. Manipur captain Subash Singh-a'n Mizoram tlarhnung a chhaih buai a, Sanathoi Meetei a nung ṭha bawk.

Minute riatna lekah Subash-a ball pet satliah chu Mizoram captain Lalrinchhana Tochhawngin a tauh chhuak na tawk lo a, Leimajam Sangkar Singh zawnah tlain ani hian kawh zetin a pet goal. Manipur-in hma taka goal an khung hnuah Mizoram ben harhin an awm a, Lalthankima thawhrah chu MS Dawngliana tan goal khung ngeina tur ni mah se Bawngkawn forward hian goal pawnah chiah a pet. Hemi hnu hian Thathana thawhrah tho hi Dawngtea'n a hmang ṭangkai thei lo.

Mizoram an chesual nawn. Tluangliana a inhliam a, physio koh luh a nih avangin pawnah chhuahtir a ni. Mizoram left back chhuah lai hian a hmun ruak hnawhkhattu siam a ni lo a, Manipur-in vei lam aṭanga an rawn nawr avangin assistant referee-in Tluangliana luhtir a phal tawh lo.

Mizoram captain Rinchhana'n Tluangliana let hman turah ngai mah se vei lamah tumah an awm loh avangin Sanathoi Meetei-a'n mual laiah la lutin Rinchhana hmachhawn mah se petna tur khawp a insiam a, goalkeeper F. Lalmuanawma kap karah a khung.

Tluangliana hi khup hliam vangin lakchhuah a ngai a, mahse hemi hma hian chawn hliam vanga BT-a lakchhuah a nih avangin Mizoramin substitution an siam ngam tawh lo. Inhliam chungin Tluangliana a khel tluan a, first half-ah 2-0 a ni.

Chak tum Mizoram

Mizoramin chak an duh a, attacking football khelh an tum. Left back Tluangliana thlakna turin player dang dah lut tawh loin BT-a thlaktu midfielder HP Lalremruata chu mualsira dah niin Malsawmfela luhtir a ni ta thung. Nung takin Mizoramin inkhel bul an ṭan a, Lalrinzuala cross chu minute 46-naah MC Malsawmzuala'n a tauh lut nghal. Mahse, assistant referee-in offside flag a phar a, replay aṭanga lan danin Siaha tlangval hi a offside lo! Mizoram an vanduai.

Mizoramin minute thum hnuah chance ṭha an neih lehnghal a, Thathana'n Sawmfela a pe fuh lo. Goal hmaah Mizoram an vannei tawk lo a, Dawngtea a khelh ṭhat ṭum a nih loh avangin an goal bawh a na tawk lo. Manipur erawh counter attack-ah an hlauhawm chhunzawm zel thung.

Minute 56-naah Sawmfela'n ball a hloh a, Manipur midfielder-in awlsam takin Mizoram tlarhnung a vawrh khum. Sanathoi Meetei-a'n um lutin amah thlawptu Pebam Renedy Singh a pe a, goalkeeper Muanawma tan dan ngaihna a awm lo. Minute 56-naah 3-0 a ni.

Goal thum chhuah hnuah pawh Mizoramin goal venhim aiin nawr an la thlang a, risk an la zel. MC-a leh substitute Vincent Lalduhawma ten chance ṭha an bawhpelh a, minute 84-naah Sawmfela leh Dawngtea te thawhrah sengin Sawma Tlangte-in kawh zetin a pet goal.

Mizoram tan si phurh sutna hun tlem a la inhawng a, mahse Mizoram tlarhnung Manipur counter attack an dawl zo lo. Minute 90-naah Manipur defender ball petchhuah satliah chuan Rinchhana a khum a, Ahmuntea aiin Manipur captain Sanathoi Meetei-a'n ball a chuh chak zawk. Sanathoi hian goal lamah a la lut a, keeper Muanawma kap karah Manipur goal lina a khung.

Chhuanlam a awm lo

Mizoram coach Lalsangzuala Hmar chuan, "Kei aia chak duh an awm ka ring lo a, ka ṭhiante leh ka thawhpuite pawhin chak an duh vek. Kan chak zo lo hi pawi kan ti a, Mizo hnahthlak zawng zawngte ngaihdamna kan dil e. Kan chak loh chhanah chhuanlam siam kan tum lo," tiin Vanglaini a hrilh.

Mizoram hian Itanagar Mizo Welfare Association aṭangin ṭawiawmtu an nei ṭha ṭhin a, Manipur an hmachhawn ṭum hian ṭawiawmtu an nei ṭha lehzual. Inkhelh ṭan chiahah 'Ro min rel sak ang che' tih an sa rual a, Mizoram hi si phur zawka an ṭang chung pawhin an au phur reng. Manipur lakah 4-1 in Mizoram an tlawm a, fan-te hian rilru hrehawm tak nena khelmual chhuahsan Mizo player-te hi an la au phur.

Mizoram coach K. Lalenghluna (Maenga) chuan, "Itanagar leh a chhehvela Mizote min thlawpna hi thinlung takin lawmthu kan sawi a, hetiang ang ṭawiawmtu ṭha kan nei hi kan vannei hle a ni. An duh ber chak result kan neih sak thei lo erawh pawi kan ti takzet," tiin Vanglaini a hrilh.