North Korea spy satellite hman theih a ni tawh

North Korea-in nikum November thlaa an kah chhuah, spy satellite chu hman ṭan theih a ni tawh. He satellite hi lei lam aṭanga thunun niin, engineer-te'n North Korea khawpui Pyongyang aṭangin an enkawl a ni.

Satellite hming hi Malligyong-1 tih niin, nikum November khan vawi hnih an hlawhchham hnuah orbit-ah hlawhtling taka kap chhuah a ni. Aerospace lama mi thiamte chuan North Korea satellite kah chhuah hian orbit-a a kal kawng a thlak ṭhin avangin lei lam aṭanga kaihhruai a ni ngei tih a chian thu an sawi, mahse, satellite hian eng ang chiahin nge hna a thawh tih chu an sawi lang lo thung.

North Korea state media chuan an satellite hian US leh South Korea sipai hmun pawimawh leh ram pahniha thil pawimawh dangte thla chu a la tawh niin an sawi. South Korea defence minstry lam pawhin satellite chu orbit-ah a awm ngei tih an hriat thu an sawi a, defence minister Shin Won-sik chuan North Korea satellite chu lei lam aṭanga thupek zawm thei chi a ni em tih erawh an la hriat loh thu a sawi.

North Korea hian a ram venhimna atan sum leh tha a seng nasa hle a, nuclear ralthuam nei zinga an tel bakah tunah hian khawmualpui pakhat aṭanga khawmualpui dang kap thei, Inter Continental Ballistic Missile (ICBM) neih tumin ṭan a la leh mek bawk. Heng bakah hian kumin chhung hian spy satellite dang pathum kah chhuah leh hman an tum bawk a ni.