Premier League club Manchester United chuan Covid-19 vanga an sum hloh chu pound maktaduai 28 a tlin tawh thu an sawi a, hei aia sang zawk la ni turah an ngai. 

Manchester United hian March 8 khan 2-0 in Manchester City an hneh a, a hnuah an inkhel leh tawh lo. Covid-19 vanga Premier League inkhel tihtawp a nih zui avangin March thlaa match thum khelh tur an la neih chu sawn a ni. 

United hian March 31 thlenga an sum hloh an tarlan danin league match khelh loh avang hian pound maktaduai riat an hloh hman a, broadcaster lamah pound maktaduai 20 an pek let a ngai bawk. 

United chief financial officer Cliff Baty chuan Premier League chu khel zo pawh ni se, match khelh hun leh ni sawn a ngaih nasat avangin broadcaster lamah an sum dawn tawh sa aṭanga pound maktaduai 20 an pek let a ṭul thu a sawi a ni. 

Red Devils hian Premier League ngawr ngawr hi sum an hlohna a ni lo a, Europa League leh FA Cup an khel thei lo te, club bungrua an la hralh chhuak thei lo te chu an tuar hle. 

Baty sawi dan chuan March 15-a Tottenham Hotspur an lenchilh tur sawn a nih tak avanga an sum hloh ringawt hi pound maktaduai li a tling. 

United hi an ba pound maktaduai 124.4 chu pound maktaduai 429.1-ah a sang chho bawk a, hetihrual hian club executive vice-chairman Ed Woodward chuan, "He hun harsa aṭang hian kan tho leh thei ngei ang tih kan ring," tiin an dinhmun a ziaawm leh thuai a beisei thu a sawi. 

---

Share this Post