Hri leng vang hian khawvel ram tam zawk chu an inkharkhip mek a, an ram chhungah infiamna lam pawh an nei rih lo. Kumin nipui laia khelh tur European Championship pawh nakkum atan an sawn fel tawh.
Qatar hian a vawi khat nan World Cup an khel dawn a, stadium an hman tur pariat zinga paruk chu kumin chhung hian zawh fel hman an tum. World Cup hi ṭum dang ang lo takin nipui laia neih a ni dawn lo, thlasik lai November leh December thlaah an khel ang.
World Cup organizing committee secretary general Hassan Al Thawadi chuan, "Kum 2022 a rawn her chhuah thleng hian he hripui hi kan hneh ngei ang tih a la chiang chuang lo, hri hi a rem deuh a nih pawhin mipui punkhawm leh inhmuhkhawm luih luih hi a la tih chi kher lo mai thei bawk.
"Tuna hun thim kan tawh hian sum leh pai, ei leh barah nghawng na tak a nei ngei dawn. Fans tam tak hian ṭum danga an la hmuh ngai loh kan chhawp chhuahsak tur hi an hmu thei lo mai ang tih pawh ka hlauthawng ru ta hle," a ti.
Qatar hian mipui vantlang tana en theih leh en phak turin World Cup thlen an tum a, chutih rualin an ram zepui pakhat angin mi hausa leh nawmchenna lam tuipui tan pawha khawsak nawmna tur tak buatsaih an tum bawk.
Login to comment
No Comments