Aizawl FC tan Thawhṭanni tlai a pawimawh

MPL champion Aizawl FC-in harsa takin I League an inpetkai a, theihtawp chhuah loa India ram club inelna sang ber aṭanga an tlak ringawt chuan a fuh lo ang.

Aizawl FC hian Thawhṭanni tlai hian tun season chhunga I League match hnuhnung ber an khel dawn a, an hmachhawn tur chu anmahni ang bawka tla thei dinhmuna ding Salgaocar a ni. Mizo club hian Salgaocar hi an hneh lo a nih chuan Mizoram chhunga I League khelh leh hun tur hi a hriat tawh loh.

Final?

I League-ah head to head en tur a ni a, Goa-ah Aizawl FC leh Salgaocar hi an inhnehtawk tawh a, RG Stadium-ah an inhnehtawk nawn a nih chuan an pahnih inkarah chungnung zawk an awm dawn lo. Relegate tur team pakhatah hi Aizawl FC leh Salgaocar inkara buk a nih chuan Goan club hi inelna pumpuia goal difference nei ṭha zawk an nih avangin dinhmun ṭha zawk tur an ni.

Chutihrualin I League relega-tion battle-ah hian Shillong Lajong, Sporting Goa, Aizawl FC, Mumbai FC leh Salgaocar te an tel a, table chunglam pathum Mohun Bagan, Bengaluru leh East Bengal te champion tuma an inum bawk avangin inkhelh hmabak hi a pawimawh vek tawh.

Vawiinah Ticket

I League ticket hi Mohun Bagan leh Aizawl FC inkhelh ṭum ang thoin Rs 50, Rs 100, Rs 200 leh Rs 1000 te a ni dawn.

Vawiin aṭangin ticket hi Olive Pharmacy (MG Rd. Upper Khatla, Near Baptist Bookroom), Lalmuan Pharmacy (Hospital Road, Near Civil Hospital Main Gate), MRF Showroom (Zarkawt, Near Bama Dawr), Red Vanda (Chanmari, Baptist Biak in hnuai), LCT Medical Store (Vaivakawn, Near Zotlang peng), Din Din Pharmacy (Khatla kawn), TT Enterprise (Bazar Bungkawn) leh Millennium Center (C-52) ah te lei theih a ni ang.