Olympic ṭhulh theih a ni - Bach

International Olympic Committee (IOC) chief Thomas Bach chuan Tokyo Olympic 2020 chu nakkumah pawh an nei thei lo a nih chuan ṭhulh mai theih a nih thu a sawi, inelna lian hi kuminah chuan neih theih a ni lo tih a chiang tawh.

Coronavirus vangin Japan khawpui chuan kuminah infiamna khawmpui lian hi a thleng dawn lo. A hming Tokyo Olympic 2020 chu ti danglam chuang loin nakkum nipui zawh hmain neih tura sawn hlat a ni.

Olympic an sawn thu hi March thla khan IOC leh Japan sorkar chuan an puang a, tun hnaiah Japanese prime minister Shinzo Abe chuan hri leng hi a reh emaw a enkawlna damdawi ṭha tawk tak an hmu chhuak a nih loh chuan nakkumah pawh mipui punkhawmna lian buatsaih a him loh thu a sawi.

IOC president Bach chuan, "Harsatna thleng thei hi a tam em em a, a thim zawnga kan thlir a nih chuan khawvelah hian beisei tur a awm thei lo ang. Tun ṭuma vawi khat kan sawn ringawt pawh hian nghawng a nei na takzet a ni.

"Infiamna peng hrang hrangte hunbi hi tih danglamsak reng a rem bik lo a, an ruahmanna leh suangtuahnate a thlawna awmtir reng theih pawh a ni lo. Tokyo Olympic hi nakkuma neih theih a nih loh chuan ṭhulh theih a ni," a ti. Bach hian nakkum July 23 thleng khawvel hriselna dinhmun an ngaihchan tur thu a sawi bawk.

Japan ramah hian nimin tlai thleng khan Covid-19 kai mi 17,100 an awm tawh a, an zinga mi 797 chuan an thih pui.



Share this Post

Login to comment
No Comments