Vanglaini - Portugal-ah stadium pakua an pawm tawh

KHAWTHLIR

CM-in enfiah

Chief minister Zoramthanga chuan nimin khan National Highway (NH) 54, Khamrang-Buichali inkar kawngpuia PWD chan a enfiah a, "Fûrpui kan hmachhawn turah NH-54 kawngpui hi a pin mai loh nan theih ang anga hmalak a, a chhe zual laite thawm

ṭhat a ngai. A ṭul a nih chuan state sorkar sum pawh a remchan dan ang zela hman ni se," a ti a; state economy inkhai chhuahna tura mamawh tam tak zingah inkalpawhna ṭha neih a pawimawh tih sawiin, thawktute chu ṭhahnemngai taka hma la turin a chah.

Chan insem

Mizoram páwn aṭanga rawn lut, Aizawl khawpuia quarantine facitity hrang hranga ni 14 chhung khung hrante chu Indian Medical Association (IMA), Mizoram Government Doctors’ Association (MGDA) leh private hospital fawng vuantute zing aṭanga din Medical Operation Team-te'n an vilpui dawn a; quarantine facility chan insemin khung hrante hriselna an enfiah ṭhin ang. Aizawl khawpui páwn lama khung hrante chu district-a chief medical officer-te'n an vil zui zel dawn a ni.

OPD sawn

Aizawl Civil Hospital (ACH) out patient department (OPD)-ah mipui inentir an tam ṭhin a, social distancing a taka kalpui a harsat avangin Medicine OPD chu May 20, Nilaini aṭang khan Dawrpui Multipurpose Centre-ah sawn a ni. ACH Medical Superintendent chuan man chawi loa hall hmantir an nih avangin Dawrpui khawtlang hruaitute chungah an lawm thu a sawi.

Ramri vengtute kan

Kolasib District Border Safety Monitoring Team-te chuan nimin khan Covid-19 doa ramri vengtu South Chhimluang leh North Thinglian task force-te hnenah buhfai ip 15, dailuah leh alu ip 8 an hlân. Team hian ramria task force duty-te an tlawh kual ṭhin a, an mamawh hrang hrangte an ngaihtuahsak ṭhin a ni.

DAWNTISEI

Portugal-ah stadium pakua an pawm tawh

Covid-19 len hnuah Portuguese league khelh chhunzawm an la tum zel a, damdawi lam thiamte chuan stadium pakua an endik tawhte chu inkhelh nan a him tawk tih an sawi.

Sorkar thuneitu lamin an ruat endiktu hian stadium dang paruk chu an vawi khat endiknaah a him tawk loah an ngai a, Vitoria Setubal, Boavista, Desportivo das Aves, Rio Ave, Gil Vicente leh Pacos de Ferreira te chu a vawi hnih nan an la endik leh ang.

Lisbon khawpuia national training ground bakah - Vitoria Guimaraes, Tondela, Porto, Sporting, Benfica, Maritimo, Braga leh Portimonense khelmual te chu a hima ngaih an ni. Team dang pali erawhin an khelmual chu endik turin an la inpeih tawk lo tih a sawi.

Ruahman dan chuan Portuguese league hi June 4 aṭanga July 24 chhunga khelh zawh tum a ni. League an chawlh lailawk hma khan Porto chuan point 60 hmuin hma an hruai mek a, pahnihna nilai Benfica nen an inthlauhna chu point khat chauh a la ni.

Share this Post

Login to comment

No Comments