N’Golo Kante-a'n training zawm lo Watford defender Mariappa-a'n Covid-19 a vei

Premier League club Watford aṭangin player pakhat leh staff pahnihin Covid-19 an vei tih puanzar a ni tawh a, defender Adrian Mariappa chuan Covid-19 a vei thu a puang. Thawhlehni khan Premier League-in thuchhuah an siam a, player leh club staff mi 748 te endik hnuin mi paruk an positive tih an puang.

Burnley-in an assistant manager Ian Woan-a'n Covid-19 a vei thu an puang tawh a, Watford aṭanga staff pahnih bakah defender Mariappa ten coronavirus hi an vei. Covid-19 vei dang pahnih hi an club awmna leh an hming puanzar a ni lo.

Premier League club zawng zawngin training an ṭan tawh a, Chelsea midfielder N'Golo Kante chuan Covid-19 hlauh vangin training a la zawm ve lo. France midfielder Kante hian training ni hmasa berah training a kal a, Covid-19 test-ah pawh a negative. Amaherawhchu Watford captain Troy Deeney nen an ṭan chhan a inang a, anmahni avanga an chhungten Covid-19 an vei an hlauh avangin club lamin an hrethiam a, chawlh an pe.

Mariappa a dam ṭha

Adrian Joseph Mariappa hi October 3, 1986 khan London-ah a piang a, Watford aṭanga inzir chhuak niin Reading leh Crystal Palace tana a khelh hnuah Watford-ah bawk a let. Mariappa hi a pi leh pu te Jamaica-a piang a nih avangin Jamaica tana khel thei a, May 2012 aṭangin Jamaica tan hian khel ṭanin vawi 49 a khelhsak tawh.

Kum 33 mi Mariappa chuan, "In ka chhuahsan meuh lo a, Covid-19 ka vei hi mak ka ti. Exercise ka lak leh naupang ka chhuahpui tih loh chu inah ka inkhung a, naupang lehkha ka zirtir bakah in lamah training ka nei. Ka party lo a, inah ka inkhung bawk avangin ka kai dan hi ka hre lo tak tak," tiin Covid-19 a vei dan chu mak a tih thu a sawi.

Jamaica international hi a dinhmun a ṭha a, Covid-19 natna a lang chhuak lo. Mariappa chuan, "Training hi ngai ta lo se chuan Covid-19 ka vei tih ka hre dawn lo a, nun dan pangngai thoin ka awm dawn tihna a ni a. A mak ang reng khawp mai," tiin harsatna a neih loh thu a sawi. Player leh staff positive te hi ni sarih chhung an khung hrang ang.

Watford captain Troy Deeney chuan Covid-19 test result a hriat hma hian training zawm a tum loh thu a sawi a, Hornets player zingah training zawm ngam lo an awm bawk. Watford manager Nigel Pearson chuan player-te hi training tura a tihluih loh tur thu a sawi.

Kante a hlauthawng

Thawhlehni khan N'Golo Kante chuan Chelsea training-na hmun Cobham chu Mercedes thar nen an pan ngei tih thlalak aṭangin a lang a, amaherawhchu a hriselna ngaihtuahin training chhunzawm a ngam lo.

Kante te chhungkua chhui letin lung (heart) lama harsatna nei an ni fur. Kante hi kum 11 lek a nih laiin a pain a thih san a, World Cup 1998 hma kar khat vel a la awm tihin a unaupa chu lungphu chawlin a thi. France international midfielder ngei pawh hi kum hnih liam ta khan training-naah a tlu tawh bawk.

Premier League hi June thla laihawl velah ṭan tum a ni a, player langsar training ngam lo hian inelna ṭan kawngah a harsatna a awm phah ngei a rinawm. Chutihrualin sum hloh tur a tam avangin khawvela football league ngaihven hlawh ber hi a harsatna lian tham dang a thleng a nih ngawt loh chuan an chhunzawm ngei a rinawm hle.



Share this Post

Login to comment
No Comments