Entu awm loa inkhelh chu a hlu lo ang - Cilic

Marin Cilic chuan entu awm loa tennis khelh a hreh, hard court inelna lian US Open chu a hmuna entu awm loa an khel a nih chuan champion tan pawh a hlutna a tlak hniam hle a rin thu a sawi bawk.

Khawvel puma hripui leng mek coronavirus vangin March thlatir lam aṭang khan tennis inelna a awm lo. Tuna ruahmanna an siam dan chuan August thla hma chuan tournament a awm dawn lo clay leh grass court season pumpui a awm lo tawp tihna a ni.

New York khawpuiah August thla tawp aṭang hian US Open khelh an tum a, inelna hi September thla thlenga khelh chhunzawm tur a ni ang. US hi hri leng tamna hmun a ni a, khawvel hmun hrang hrang aṭanga player zin lut an awm dawn avangin inelna buatsaihtu lam chuan eng tiangin nge an kalpui dawn a la chiang lo.

Arthur Ashe Stadium-a nomawi chawi tawh Cilic chuan, "Entu awm loa inkhelh chu practice match ang mai a nih ka ring, boruak nuam leh hlimawm zawng zawng kha a tel ve dawn lo tihna a ni a, a hlutna a hniam hle ang.

"Amaherawhchu, hri leng hian eng chen nge a daih dawn kan hre lo, kumin chauh ni loin season thar pawh a nghawng mai thei. Player-ten inkhelh duh viau mah ila thuneitu lamin hriselna lam atan a la him lo an tih chuan dawhthei taka kan nghah a ngai," tiin a sawi.



Share this Post

Login to comment
No Comments