Italian league zawh hun tur August 20

Italy football federation (FIGC) chuan tun season hmawr bawk hun atan August 20 an ti chiang a, season thar chu September 1 aṭanga khelh ṭan leh a ni ang - pre season an nei mumal hman dawn lo.

Italian football season kal lai hi March thla laihawl aṭang khan Covid-19 vangin an chawl lailawk, tunah hian team training nei leh tawh mah se engtik hunah nge league an khelh chhunzawm dawn tih erawh hriat a la ni lo thung.

Italy sports minister Vincenzo Spadafora bakah FIGC president Gabriele Gravina leh Lega Serie A chief Paolo Dal Pino ten May 28, Ningani hian league khelh chhunzawm hun tur chu an ti chiang ang.

Inelna sang ber Serie A team-te chuan match 12 khelh hmabak an la nei, team pariat erawh chuan match 13 khelh tur an la nei thung. Chawlh lailawk a nih hma khan champion lai Juventus chuan Lazio lakah point khatin hma an hruai mek.



Share this Post

Login to comment
No Comments