Chelsea-ah Giroud cham chhunzawm

Tun season tawp ruala Chelsea chhuahsan mai tura ngaih Olivier Giroud chuan kum khat daih contract a ziah belh a, English club tan hian season thar lo awm tur chu a khelh chhunawm dawn tihna a ni.

Arsenal striker hlui Giroud hi Blues tan rinrawl a ni lo. France tan erawh a inlan phak reng thung, club lamah inkhelh tam a duh avangin January bazar lai khan a chhuak hman teuh hle, manager Frank Lampard-a'n a chhuah phal mah se a chhuak leh ta lo.

Stamford Bridge-ah lungawi takin a cham chhunzawm a, striker Tammy Abraham inhliam karah Lampard tan a hna tlin takin a thawk. Tunah chuan khelhna hmun nghet chan tumin Abraham leh Michy Batshuayi te nen an inel chhunzawm ang.

Blues manager Lampard chuan, "Chelsea ka enkawl aṭanga ka thil hriat chian pakhat chu Olivier-a lo puitlin zia hi a ni, player puitling leh ṭha a nih bakah mihring zahawm tak a ni bawk.

"Khelmual chhung leh a pawnah player naupang zawk tana entawn tlakin a awm a, kan hnena a cham chhunzawm tur hi ka lawm hle, a tawnhriat leh theihna sang tak hi midang tan zirlai ṭha tak a ni," tiin a sawi.

Chelsea tan Giroud hian match 76 a khel tawh a, heng zinga match 39-ah hian inkhel bul a ṭan; goal 21 khungsak tawhin FA Cup leh Europa League nomawi a chawi pui tawh.



Share this Post

Login to comment
No Comments