Panama Paper Rinhlelh kai zingah FIFA president Infantino

Panama law firm pakhat Mossack Fonseca-a tax docu-ment maktaduai 11.5 zet put rua ram hruaitu ṭhenkhat leh mi hausa tam takin chhiah awl ruk tuma ram danga an sum chheprelh dan chungchangah FIFA president thar Gianni Infantino hming a lang tel a, khawthlang media zingah zawhna tam tak a piang nghal.

He document put ru zingah hian football broadcasting com-pany Full Play Group neitu Hugo Jinkis leh a fapa Mariano Jinkis-te'n Ecuador ram chhunga UEFA Champions League chhuah phalna dik lo taka an leina a awm tel a, he document-a hming ziaktu chu khatih hunlaia UEFA director tuna FIFA president ni ta Gianni Infantino a ni.

Infantino chuan tun hnaia document put ru avang hian midangte nena an thawhhona chu rinhlelh a kai mai a hlauhthawn thu a sawi a, television rights chu a ngam huai ber hnena hralh a nih thu a sawi bawk.

Jinkis pafa

May, 2015-a USA court-in FIFA hruaitu hlui leh sum-dawnna lama FIFA thawhpui ṭhinte eirukna leh thamna sum chungchanga inrawlh hming a puan chhuah zingah Hugo Jinkis leh a fapa Mariano Jinkis-te hi an tel. US court hian television rights lei an tumna kawngah Hugo te pafa hi South American football official ṭhenkhat chu dollar maktaduai tela tham ṭhinah an puh a, Argentinian sumdawng hausa pafa hian Argentina aṭanga USA court lama hruai an nih loh nan an bei mek.

Hetihlai hian UEFA chuan FIFA hnuaia eiruk thubuaia hmingchhiate chu tumah thawhpui an neih loh thu an sawi a, tun hnaia document put ru aṭangin Hugo Jinkis leh a fapa Mariano Jinkis-te hi an lo thawhpui ngei a ni tih a lan leh tak si avangin UEFA chuan television rights chu a leitu company lam ngaihtuah loa a chhang huai ber hnena an hralh thu an sawi leh lawi si.

Eng nge buaina chu?

Football broadcasting com-pany Full Play Group neitu Hugo Jinkis leh a fapa Mariano Jinkis-te hian full play group banner hnuaiah Cross Trading tih hming puin company an nei leh a, Cross Trading hming hian 2006-07 leh 2008-09 inkar season UEFA Champions League kha Ecuador ram chhung bika chhuah phalna chu an lei.

Cross Trading hian Tele-vision rights lei nan hian £78,000 an seng a, mah se docu-ment put ru aṭanga a lan dan chuan Ecuadorian TV broadcaster Teleamazonas hnenah an television rights hi £220,000-in an hralh chhawng.

South Pacific Ocean-a thliar-kar pakhat Niue-a hmun-pui nei Cross Trading hian UEFA Super Cup chhuah phalna chu £20,000 in an lei bawk a, Teleamazonas hnenah vek hian £89,000-in an hralh chhawng leh a, hei hi buaina tak chu a ni ta a ni.

UEFA-in a chhang huai ber hnenah television rights hralh anga insawi siin Cross Trading hnena an hralhna zat hi a beitham hle a, television rights hralhna zat let thum vela lei ngam an awm reng laia Cross Trading-in neitu nihna an nei hi a mak a, Infantino hi documents put rua a hming a lan vang ngawtin thamna sum a la ngei a ni tih finfiahna awm lo mah se thil kal kual dan aṭang chuan thamna sum la ngei angin a lang.

Cross Trading thawhpui zingah tun hnaia eiruk thubuaia chhui zinga mi FIFA ethics committee member Juan Pedro Damiani a tel bawk a, Infantino hi a lo fihlim lo a nih pawhin a mak lo ang.

UEFA ngaihdan

Europe-a football thuneitu sang ber UEFA chuan television rights hralh dan chungchangah thil dik lo engmah a awm loh thu an sawi a, Cross Trading chu Teleamazonas hnuaiah agent anga an awm thu an sawi.

UEFA sawi dan aṭanga a lan dan chuan rights leitu tak hi Cross Trading ni loin Teleamazonas an ni a, Ecuador television channel aiawh hian Cross Trading chu an inlan ve chauh a ni. UEFA chuan hetiang a nih avang hian Teleamazonas leh Cross Trading indawr dan chu company pahnih thutlukna a nih thu sawiin an inrawlh loh thu an puang.

Nyon, Switzerland-a hmun-pui nei UEFA thupuangtu chuan Cross Trading nena an contract chu Champions League TV rights 100 chuang zinga pakhat ve mai a nih thu an sawi a, May 2015-a US court-in FIFA a chhuichian hnu-ah an documents zawng zawng chu anmahnia an lo zir-chian vek tawh thu an sawi bawk.

UEFA chuan Gianni In-fan-tino chhan nghalin, "Docu-ments-a Infantino hming a lan chhan chu Television rights reng rengah UEFA director-te'n an hming an ziah hnan a ngaih ṭhin vang a ni a, documents-ah hian amah chauh niloin director dang hming ziak pawh a awm a, hei hi chu kan kalphung ve reng a ni," tiin thuchhuah an siam.

Europe-a football thuneitu sang ber UEFA chuan Infantino chu mi dik leh kum tam tak chhung UEFA ṭhatna tura nasa taka hna lo thawk tawh ṭhin a nih thu an puang bawk a, an general secretary kalchhuak chu an chhan hle.

Infantino thukhawchang

February 26-a FIFA presi-dent atana Sepp Blatter-a thlak hlima FIFA hmingṭhatna nei let tura a theihtawp a chhuah tur thu sawitu Infantino chuan, "Tun hnaia mawi lo taka ka chungchang sawi a nihnaah UEFA nen pawh kan inbe tawh a, he contract chungchanga thudik mipui hriat ngai chu an puang chhuak tawhin ka hria," a ti.

Kum 46-a upa Switzerland lam chhuak chuan sawi chhunzawmin, "Cross Trading nen hian a mimal taka indawrna emaw a neitute nena inkawmna pawh kan nei lo. Kan contract ziahte kha chu kan marketing team-in an buaipui vek a ni. Thuthar thehdarhtute'n an tarlan anga tih dik loh hi keimah emaw UEFA-in he television rights chungchangah hian kan nei lo," tiin a fihlim thu a sawi.

Eng tin zel?

FIFA ethics committee member Juan Pedro Damiani chu tun hnaiah eiruk thubuai avangin chhui mek a ni a, nikum lamah FIFA hi eiruk thubuai avanga nasa taka a lo mualpho tawh bawk avangin documents put ru zinga UEFA hming leh FIFA president thar Infantino hming lo lang tel ve leh hian football khawvela thuneitu sang ber FIFA kal zel dan turah nghawng a neih hlauthawng an tam hle.

He documents put ru kal zel chungchangah UEFA chuan US Department of Justice inves-tigation chu kawng tinrenga puih an inhuam thu an sawi a, Pa-nama Paper chungchang hi a la ngaihnawm dawn chauh niin a lang.