Neuer-a'n contract thar a ziak

Bayern Munich goalkeeper Manuel Neuer chuan contract thar a ziak, German club nen hian June 2023 thleng daih inremna an ziak a, tun season tawp ruala contract tawp mai tur chu season thum atan an pawtsei tihna a ni.

Kum 34 mi Neuer leh Bayern hi an inrem thei mai lo, club leh mimal inbiakna chu media lamin an hre ru a, pawisa leh contract rei zawngah an inrem thei mai lo tih thlengin an hria, he thil thleng vang hian Neuer pawh a lawm lo.

Mahse, German champion-in an goalkeeper hi chhuahtir an la tum lo a, a hlawh tur zat tarlan ni chiah lo mah se a lungawina tawk pawisa an pe dawn ngei niin a rin theih.

Bayern captain chuan, "Inkharkhip lai khan thutlukna ka siam duh lo, mi tam zawk khan football kan khel chhunzawm leh thuai dawn em tih kan hriat loh vang a ni. Tunah chuan kan inkhel thei tih a chiang tawh, Allianz Arena-ah hian hmabak eng tak tawn tumin beiseina nen ka awm.

"European club zingah chuan Bayern hi a lian berte zinga mi a ni a, he hmuna ka cham chhunzawm thei tur hi ka lawm," a ti. Bayern CEO Karl-Heinz Rummenigge pawhin inremna an nei thei chu an hlim thu leh lungawi thu a sawi.

Neuer hian 2011 khan Schalke aṭangin Bayern a zawm. Allianz Arena-ah hian season kua hun a hmang tawh, hetih chhung hian Bundesliga nomawi pasarih, German Cup panga leh Champions League pakhat a chawi tawh.

Germany tan pawh match 92 a khel tawh a, 2014 FIFA World Cup-a hlawhtlinna an chan theih nan khan a thawhhlawk hle. A kum tam deuh tawh mah se a la tlahniam lo, coronavirus len hnua Bayern-in match an neih leh hmasak bera Union Berlin nen an inkhelh khan goal a chhuah lo.



Share this Post

Login to comment
No Comments