League Cup WINNERS , Premier League ? , Europa League ? , FA Cup ? : Chelsea ngamtu Liverpool-in nomawi an chawi

Sum ngah ngah an hmelṭha lo - i awih loh chuan Liverpool fan-te zawt mai rawh! Pound tluklehdingawn tela team ropui din tum Chelsea chuan hliam ngah vanga academy player-te nena League Cup final hmachhawntu Liverpool an ngam lo a, zak taka kun hniam chungin Wembley Stadium an chhuahsan.

Pathianni zan khan Carabao Cup final-ah Liverpool leh Chelsea an intawng a, minute 90 chhunga 0-0 a nih hnuah Virgil van Dijk a inlar a, Dutch defender hian extra time-ah ṭha zeta tauh lutin Reds a champion pui.

Liverpool-in League Cup nomawi an chawi ta a, an hmabakah Premier League, Europa League leh FA Cup a la awm - fan-ten hei hi a bul ṭanna chauh a nih an beisei a, Jurgen Klopp-a'n nomawi pali nena Liverpool mangṭha a duh dawn.

Chelsea erawh FA Cup chiah nomawi beisei tur an nei ta a, season tharah European football an khelh hmel loh bawk. Khawvel mi hausa tam takin an sum hmangin club ropui an din a, Chelsea erawh an sum ngah luat an tuar em ni chu aw, tih turin an tlusawp mek.

Hlauhthawnna

Liverpool fan-ten hlauthawngin Wembley-a an inkhel tur an thlir - beisei phak lo Chelsea an hlauh vang ngawr ngawr a ni lo a, hliam an ngah vang a ni. Hliam zingah Mohamed Salah leh Darwin Nunez an inlan theih mai theih thu sawi a ni a, mahse, squad puan a nih rualin beisei a bo nghal.

Salah hmuh tur a awm lo a, Nunez a awm lo bawk. Anni bakah hian Alisson, Trent Alexander-Arnold, Diogo Jota leh Curtis Jones chu inlan thei lo chiang an ni a, hei ringawt pawh Reds ṭantute tan chuan manganpui tham a ni.

Mahse, Liverpool-in huaisen takin final an hmachhawn a, a tawpa an hlawhchhuah chu nomawi a ni. Liverpool hlauhthawnna belhchhah turin nipuia Reds aia Chelsea thlangtu Moises Caicedo chuan na takin Ryan Gravenberch a rap a, Dutch midfielder hi lakchhuah a ngai.

Caicedo chet dan hlauhawm viau mah se, referee-in card phawrhna turah a ngai lo a, Chelsea midfielder a vannei takzet. Liverpool tan defender Joe Gomez a luh a ṭul a, minute 28-naa thil thleng avangin Harvey Elliot chu midfield-ah tawlh letin, right wing-ah Conor Bradley-a'n mawhphurhna a la a, Joe Gomez chu right back-ah a ding.

Fak tlak Kelleher

Reds tan Alisson awm pawh ni se League Cup-ah chuan hmun chang chiang goalkeeper Caoimhin Kelleher-a'n inkhel bul a ṭan a, Liverpool-in an champion vanga lawmthu hrilh tur an nei a nih chuan Kelleher hi a ni ang.

Kelleher hian Cole Palmer khung ngei tur nia lang chu ṭha zetin a dansak a, hnai set sawt aṭanga Conor Gallagher chance neih a dante kha 'world class save' kan tih loh chuan engtiangin nge kan sawi chuang ang?

Chelsea tan Raheem Sterling chuan goal a khungah inngai mah se, offside vangin pawmsak a ni lo a, Gallagher-a'n woodwork a tihper a, Chelsea hian an chak lohna chhuanlam tur an nei ve tho a, goal hmaah an vannei tawk lo.

Mahse, Liverpool-in an ṭhat dan berin an khel lo miau a, Reds player naupang rual hmaa tlawm hi Chelsea ṭantu tak tak tan chuan a na lehzual ang - 2021-22 season khan League Cup leh FA Cup final-ah an lo ngam lo tawh bawk.

Harsatna karah

Liverpool-in an neih ṭhat ber fehchhuahpui lo mah se, huaisen takin an bei a, an hmuhnawm takzet. Van Dijk-a'n goal hmahruai a khungah inngai mah se, Wataru Endo offside vangin pawmsak a ni lo a, Liverpool fans au thawm kha Chelsea fan-te lawmnain a hliahkhuh zui.

VVD goal khung hi video assistant referee hmanga ennawn a ni a, Japanese midfielder khel ṭha em em mai Endo hian Chelsea defender Levi Colwill chu a dang nia a lan avangin offside ham a ni a, Liverpool fans an lungawi lo.

Reds tan hian Cody Gakpo chuan chance duhawm nei mah se, post a tauh per a, Chelsea keeper Djordje Petrovic chuan Liverpool rawlthar Jayden Danns chance duhawm chu ṭha zetin a dansak a, Harvey Elliot a vanduai lehzual.

English midfielder hian position ṭha zet aṭangin goal hrulah bak a pet thei lo a, a ball tauh Petrovic-a dansak chu League Cup final tihmuhnawmtu zinga chhiar tel loh atan chuan uiawm a ni.

Captain Fantastic

Liverpool-in duat taka 'Captain Fantastic' tia koh ṭhin an nei a, a hming chu Steven Gerrard a ni. Chelsea lakah khawng taka ding, naupang rual khati taka ṭhaa kaihruaitu VVD kha Stevie G nen em chuan khaikhin rem lo mah se, tun ṭum chauh chu 'Captain Fantastic' tih loh rual em ni ang?

VVD hi a goal khung hmasa zawk pawmsak ni lo mah se, a hun teah rahin a par chhuak a, minute 118-naah bench aṭanga luhtir Kostas Tsimikas-a corner aṭanga ball kal chu ṭha zetin a tauh lut - Wembley thawm chu a chim dawn em ni chu aw, tih tur khawpin a ring!

Chelsea-in beih let tum ngial mah se, hun a tam tawk tawh lo a, a tawpah chuan 1-0 in Liverpool an chak a, Wembley Stadium-ah champion nomawi an chawi - he team hian Premier League-ah hma an hruai mek a, Europa League round of 16-ah Sparta Prague an hmachhawn dawn a, Nilaini zan hian FA Cup fifth round-ah Southampton an mikhual bawk ang.

A tawi zawnga sawi chuan Liverpool hian champion theihna pathum an la nei a, Chelsea laka an chakna hian inrintawkna a pe ang tih a chiang. Blues tan erawh Wembley-a final an khelh hnuhnung paruka an tlawm vawi rukna a ni a, heng zinga pathuma an ngam loh chu Liverpool an ni.