Sreenidi Deccan-in Aizawl FC an sawp

Aizawl FC-in February 19, Inrinni zan khan Sreenidi Deccan an mikhual a, RG Stadium-ah 5-1 in an mualpho. Mizo club hi coach thar Bobi Stojkoski hnuaiah result ṭha neih an harsat a, match thumah point khat chiah an la hmu.

B. Malsawmzuala hnuaiah Aizawl FC an che ṭha a, amaherawhchu Mizo coach hnuaia an chet ṭhatna hi Bobi hnuaia an chhunzawm theih loh avangin table-ah pawh pasarihnaah an tla thla tawh. Mizo club hian Rajasthan (Feb 23), Real Kashmir (Feb 28), Trau (Mar 2) leh Shillong Lajong (Mar 9) te an mikhual chhunzawm dawn a, rang taka an insiamṭhat a pawimawh ang.

One-One

Aizawl FC hian coach Sawmtea hoin Sreenidi Deccan hi an mualah 2-1 in an hneh tawh a, team ṭha tak ni mah se RG Stadium-a inkhel tur an nih bawk avangin Mizo club tan hneh theih tur an ni. Mahse, Mizo club-in Mizo tlangval Lalromawia leh B. Lalnuntluanga te telna Sreenidi an ngam lo a, mikhual team an chungnung zawk.

Box chhungah ball-in captain Lalchhawnkima kut a per a, penalty a chawi. Mizo club an vannei a, David Munoz-a'n goal ban pet per nan a hmang. Minute 28-naah Sreenidi an vannei ta tho. Throw in satliah anga lang chu an veng thei lo a, ball per nangfuhtu David Munoz-a'n chiang takin goal a khung.

Mizo club hnufual hret mah se halftime an hmang ṭha a, minute 49-naah Joe Zoherliana hmangin siphburh an sut. R. Lalthanmawia ball vawrhluh chu Lalthankhuma'n tauhin goalkeeper-in a ti per a, Zohera hian a tauh goal.

Red card a pawi

Goal luh aṭanga minute lina lekah Cherhlun tlangval TK-a a chesual zui a, ṭul lo zetin mual sirah Deccan player a pet tluk avangin yellow card vawi hnihna a hmu. Aizawl FC-in player 11-in mikhual team an ngam lo a, player 10-a an khelh a ngaih zui avangin point hlawhchhuah beiseina a chau.

Minute 67-naah Sreenidi-in corner kick an hmang ṭha a, Eli Sabia-a'n tharum hmang ṭangkaiin hmahruaina goal a tauh lut. Aizawl FC-in tlarhnung tichhah mah se mikhual team an khel ṭha tulh tulh a; Sreenidi lamin Ibrahim Sissoko bakah Mizo tlangval che rang pahnih Brandon VL Remdika leh R. Lalbiakliana te an luhtir.

Subsititute Sissoko hian minute 85-naah box pawn aṭangin mawi zetin a hlai lut a, AFC tlarhnung dem theih a ni lo. Mizo tlangval Brandon pawhin a tlan chakna leh thiamna hmangin minute 90-naah ṭha zetin a khung zui a, Hunthar tlangval hian amah chherchhuaktu club a hre reng - a goal khung a lawm duh lo.

Injury time-ah pawh minute sarihnaah Sissoko bawk a rawn inlar a, Ivorian forward hian box chhungah mawi zetin a volley goal. Aizawl FC-in mangchhia an tawng a, Sreenidi Deccan lakah 5-1 in an mualpho.