Mizoram team an thleng tluang

FIFA Santosh Trophy khel tur Mizoram chuan nimin zing khan inelna neihna tur hmun Itanagar, Arunachal Pradesh chu tluang takin an thleng. Mizoram team hi Tsangpo Hotel, Kime Pakka-ah an thleng a, team meeting hmasa berah manager K. Lalenghluna (Maenga) chuan Mizoram hmel an nih avanga nungchang pawh uluk turin player-te a chah.

Manager Maenga hian kum 2019 aṭang khan Mizoram team hi Santosh Trophy-ah a hruai tawh a, hemi hma hian kum bithliah inelnaah Mizoram team a hruai tawh bawk avangin tawnhriat a nei ṭha tawh hle. Mizoram manager Maenga chuan, "Kan team discipline a ṭha ṭhin a, Amritsar-a kan chet dan kha Itanagar-ah pawh kan chhunzawm a ngai. Inkhel turin Itaganar-ah kan kal a, tumahin kan training leh inkhelh dawn tih lohah chuan hotel kan chhuahsan tur a ni lo, hetah hian player-te chauh ni loin coaching staff-te pawh kan tel vek.

"Mizoram team hi Mizo hmel kan ni a, kan chet dan hi Mizote min hriat zui zel dan tur a ni. Training-naa kan nungchang mawi kan chhunzawm zel ang. Senior player leh kum naupang zawkte room tinah kan inawm pawlh a, tun inelnaah hian tawnhriat nei player aṭangin kum naupang zawkten thil tam tak hriat belh kan tum tur a ni," tiin player-te a fuih.

MFA hruaituten Mizoram team hi Aizawl an chhuahsan hmain an thlah a, MFA finance secretary Lalruatsanga Tochhawngin fuihna thuchah a sawi. Inelna neihna hmun an thleng a, Itanagar Mizo Association aiawh mi panga ten train station-ah an lo hmuak a, hotel-ah Mizo Association President-in a tlawh nghal bawk. Itanagar-ah hian Mizo 100 chuang hret an awm a, a ni khatna aṭangin Itanagar Mizoten Mizoram team an thlawp ṭha nghal hle.